University of Virginia Library

Henricus

Hii ȝolde þe king vp þo þe keien of þe toune
So þat þe toun was þo al clene ibroȝt þer doune
At þe feste of seint edward þe king huld þo anon
At londone a parlement & heiemen manion
Þere hii lokede þo þat alle þat armes bere
Aȝen þe king in þe worre oþer aȝen him were
At norhamtone at lewes oþer at euesham
Barun erl oþer kniȝt burgeis oþer freman
Þe burgeis of norhamtone & of londone þer to
Were alle deserited & hor eirs al so
Ac manie of þe heiemen ne grauntede it noȝt al
As þe king of alemaine ne þe erl marschal
Ne sir philip basset ne oþer manion
Ne grauntede noȝt þe lokinge ac wiþsede it echon
Þe contesse of leicestre þat sir simondes wif was
De montfort & þe kinges soster þo heo ne sei oþer cas
Þe castel of penneseie heo ȝolde vp þe kinge
At sein simondes tid & sein Iude as wiþoute striuinge
Þat heo hadde iholde er suþþe estre biuore
& þo heo hadde al clene ir ioye al vorlore
Me flemde ir out of engelond wiþoute aȝe coming
Alas ir tueie breþeren þat eiþer of hom was king
& nadde bote ir one soster & hire wolde so fleme
Alas were was loue þo suiche domes to deme
Þo com fram bi ȝonde se to alle halwe tid anon
Þe quene wiþ a legat þat het sir otebon
Wiþ þe popes poer to do þe kinges wille
Þe legat þo he was icome lute wule was stille
Of þe clergie at londone at seint andrewes feste
A conseil he made & ssewede þere þe popes heste
Wuch poer he him ȝef & clerkes anon
Þat hulde wiþ sir simon he greuede manion
Þe bissop of londone & þe bissop of wircetre
& þe bissop of lincolne & þe bissop of cicetre
Wiþoute eni grace he suspendede echone
Þat no man hom ne asoilede bote þe pope one
Þo þer nas oþer red hii wende uorþ to rome
Þe bissop deide of wincestre ar hii aȝen come