University of Virginia Library

Brutus occidit patrem et exulat.

Þe child wax & wel iþeȝ as þe clerc seide er
Suþþe þo hit adde þe elde of viftene ȝer
As he wolde ssete an hert al aȝen is wille
To deþe he sset his owe fader þat he lai þer stille
Hit him of þoȝte sore inou & naþeles ȝvt he was
Out of þe lond idriue vor þe deolvol cas
In to þe lond of grece he wende & þo vond he þere
Of þe kinde of priamus mani men þat þere were
Þat were of his nexte blod þat were þer in seruage
Vor her eldrene were þer biuore inome in ostage
Fram þe bataile of troye wreche as hit were
Vor þe grete slaȝt and wo þat hore kunde dude þere
Þo brut among hom com to such prowesse he drou
Þat al þe kun þat him iseiȝ adde of him ioye inou
So þat atte laste þo he in stat was
& him þoȝte þat is per in þe world nas
Þat folc al of þulke blode to him drowe vaste
Þat he ssolde is owe kunde of þulke seruage caste
Hii come alle aboute him so þat brut isey
Þat þer was of hom gret poer & noble volc & hey
Hii ȝarked hom to gadere þat vair ost it was
To þe king of grece he sende þat ihote was pandras
Þat he ssolde þe noble folc þat of so noble blod com
Oout of seruage lete & out of þraldom
Oþer him ne ssolde noȝt wondri þei hii dede hor miȝte
Wiþ hor bodies þat aȝte be so fre vor to winne hor riȝte
Þis king adde in is þoȝt gret bisemare of þis þinge
He ȝarkede is ost anon him to gronde bringe
Þis brut aien him wiþ is ost wel wisliche drou
Hii smite þer an bataile hard an strong inou