University of Virginia Library

Oþer hii mote þanne acordi oþer fiȝte hom sulue tuo
Wat reson is þat hii ne mowe as wel nouþe so
Þe wule hii abbeþ eni aliue þat hom mowe serui & drede
Nere hom noȝt boþe uairor so wuwat is þis gidihede
Þer were wule in engelond at on time kinges fiue
& alle hii were riche ynou & of noble liue
& nou to lute to hom tueye al engelond is
& ofte wo so coueiteþ al al leseþ ywis

Ȝif eiþer king so moche wilneþ to be louerd her
Þat hor noþer nele abbe felawe ne per
Fiȝte hom sulue tueye þat louerd wole be one
Wy nere hom noȝt so betere nou þane wanne hor kniȝtes echone
& hor folc were aslawe al & hii bileued al bare
& ne founde wo hom seruede in anguisse ne in care
Ne wo mid hom in nede þat lond defendi miȝte
Her of þat soþe seggeþ ȝe as bi ȝoure in siȝte
Nadde þis kniȝt folliche is reson ysed
Þat is felawes nadde sone ynome hor red
& sede alle mid one mouþe we ensenteþ þer to
Þat þis tueie kinges acordi oþer bataile hom sulue do
Þis king edmund þo he hurde þis fol was of ioye & blis
Þe bataile he sede he wolde nime mid god herte ywis
Þat word he sende amorwe to knout among is fon
& he grauntede is owe bodi þe batayle to do anon
Hii lete hom armi beye & in to an yle mid god pas
Amidde seuerne hii wende þat olenege icluped was
Þerinne hii were hom sulue tuo & þat water al aboute
Hor ost was eiþer in is side alonde bileued wiþoute
Mid gret ernest & god ynou hor suerdes hii adrowe boþe
Þis kinges þo hii to gadere come & mad hom boþe wroþe
To grounde hii smite & harde mid stalwarde honde
Þat wonder was hou oþer miȝte oþeres dunt at stonde
Þo king edmond ywraþþed was & wiþinne hot
He ssoc is suerd & gronte & mid such ernest smot
Þat þat fur sprong out mid ech dunt out of þe helm so þere
Þat it þoȝte mid ech dunt þat þat heued afure were
As þonder þat soun was þe siȝt as liȝting
So þat ech dunt þoȝte liȝt as it were & þondring
Me seiþ of a stalwarde kniȝt ac me wondred on þere
Yblessed be þe moder wombe þat him to monne bere