University of Virginia Library

Edmond

& ȝif hii adde in gode loue longe iliued beye
Me adde þoru al cristendom yspeke of hom tueye
& ech prince & ech lond ydouted hom tuo
Ac edmond was al to raþe alas to deþe ydo
Vor þe luþer duc edric þoȝte euere to bitraye
King edmond is owe louerd knout uor to paye
A luþer gadeling was is sone boþe at one rede
Hii fondede mid alle gile to do þis luþer dede
Þo hii ne miȝte anoþer wise þis dede bringe to ende
In to an chaumbre foreine þe gadeling gan wende
Þat king edmond com ofte to & in þe dunge þar
Hudde him bineþe in þe dunge þat nomon nas ywar
Þo þe king þer to com is nede uor to do
Þe luþer þef ȝare was mid is arme þer to
& smot him þoru þe fondement & þoru þe gottes riȝt
Edmond þe noble king þat was so noble kniȝt
Wiþ a long ipointed knif iegged in eiþer side
Þus senduolliche he him slou aboute seint andrewes tide
At oxenford he was aslawe þoru þis luþer lore
Mid treson & gile ynou inot hou miȝte be more
Þe beste bodi & noblost þat in eni lond þo was
Islawe was þoru a gadeling so villiche alas
Ar men miȝte aboute come þen þef to seche þare
Of scaped he was & iflowe nomon nuste ware
Me greiþede þis gode king wanne non oþer nas
& broȝte him vaire an erþe as he wel wurþe was
In þe abbey of glastingburi biuore þe heye weued an hey
Vor he wilnede vorto ligge is grantsire ney
Þe king edgar þe gode king þat þere ybured is
Þere hii liggeþ uaire ynou boþe ȝut ywis
Ac þis luþer gadeling þat þe king so slou
To king knout wende anon glad & prout ynou
He grette him anon & sede hail þou be king one
So nis it noȝt quaþ þe king uor mi kinedom is ymone
Vor an felawe ich abbe þer to þat ich louie ynou
Vor gode sire king quaþ þis þef uor þi loue ich him slou
Here is þat knif al blodi þat ich broȝte him wiþ of dawe
& smot in þoru þe foundement & so in to þe mawe
Þi loue ich abbe wel dere aboȝt & mi lif an auntre ydo
Þer nis non aliue nou þat þe abbe yserued so