University of Virginia Library

Iohannes

Ich ise wel quaþ þe king þat ȝe ne louieþ me nouȝt
To binime me mi kinedom me þincþ ȝe abbeþ iþouȝt
Ac bi him þat made al þe world ȝuf ich adde iwust þis
Þo ȝe verst come in þis lond ich ȝou wolde iwis
Habbe imad heie ride al þis ȝer longe
As wel þou miȝt segge quaþ pandulf þat þou vs wost abbe an honge
Wan þou seist quaþ þe king þat þat was mi þouȝt
So gret louerd as þou art Ine wiþsegge þe nouȝt
Ac ich sende to rome to abbe help of þe
& of þe pope & is poer & ȝe beþ aȝen me
Þine cause quaþ pandulf in riȝte & nouȝt in wou
We auauncieþ as in god & louieþ þe inou
& vor þi loue hider we come þe bet uor to lere
Þat þou to god & to holichirche obeysant were
& þou seist þat þou vs wost habbe ilate an honge
Siker we ne weneþ of þe non oþer mede auonge
Ne in non oþer entente we hider ne come
Bote þat we vor holi churche þun deþ of þe nome
Þe king anon in wraþþe let prisouns vorþ bringe
Þat uor þufþe were inome & uor oþer þinge
& demde hom biuore pandulf & let hom honge heye
As him vorto afere riȝt biuore is eye
A clerc þat was among hom þe king het anon
Þat me ssolde him honge hecst of echon
Pandulf þei he wende wel himsulf to honge sone
Ne sparede he noȝt þeruore to do wat was to done
In þe popes half he sede ich uorbede vpe mansinge
Þat no man ne touchi þulke clerc to him to deþe bringe
He esste boc & candle þe sentence to do bliue
Þe king þo him wiþdrou & let him gon aliue
& vewe wordes þer were mo & þo al þis was ido
Mid such loue þe king & pandulf departede a tuo
And þe king bileuede amansed & ech þat mid him was
Pandulf wende to rome & tolde al þis cas
Þe pope & is cardinals In þe ȝer of grace ywis
Tuelf hundred & þretene ido was al þis
Þe pope ȝut him biþoȝte ar he verrore nome
& alle þe bissops of engelond let someni to rome