University of Virginia Library

Henricus

& sir edward & sir henri & sir vmfray de boun
To gloucetre hii wende to enfermi þen toun
Þer hii bigonne mid hor ost fourten niȝt abide
Þe erl of gloucetre was in þe forest biside
& sir Ion giffard al so vpe an hei hul lai
Þat me clupeþ erdlond boþe niȝt & dai
Gret fur he made þer aniȝt of wode & of sprai
& tresche ladde þer aboute þat me wide sai
& in to gloucetre al so þat is fon iseie
Ware hii ssolde him finde vpe þulke hul heie
Bi tuene þe erl of gloucetre heiemen ofte wende
& sir simon de Mountford hor herte vor to amende
So þat hii were acorded þe tuelfte dai of mai
Þei it were lute wurþ as in a tywesday
To stonde atte lokinge of þe bissop water
Of wircetre & al so of sir hue þe spencer
Of sir willam de Mounchalsi of sir Ion le fiȝ Ion
Vpe þe lokinge of þes foure to bringe hom aton
Þo wende sir simon be siker & toward þe march wende
Ac vnneþe he of scapede þat is fon him ne ssende
Þat þe erl of gloucetre mid is poer him ne nom
& naþeles þoru godes grace to hereforde he com
Þere he bileuede mid is ost betere cas to abide
Þe erl of gloucetere was þe wule in mani wilde side
Wan me wende he were fer ofte he was ner
& sir Ion giffard mid him & sir Roger de mortimer
Vuele hii were alle þre vorto finde ilome
& messagers bituene hom & sir edward ofte come
So þat þer was bituene hom god fourme inome
Hou sir edward miȝte best out of warde come
Sir simond de montfort wisman þei he were
Het þat me sir edward gret reuerence bere
Vor to pleie vp & doun as in compainie
So þat þer was a gile yspeke as þoru god aspie
Sir edward bed sir simon þat he him ȝeue
To a prikie stedes wiþoute toun leue
Leue him was igraunted god wot to wuch ende
So þat sir edward wiþoute toun gan wende