University of Virginia Library

Auncel king of scotlond & vrian is broþer
King of þe lond of murifens vor he was ner þan an oþer
Of þe contreie of lodenesie Lot he made king
& of al þe contreie þat þer to uel & þat was gret þing
Þo he adde al þis lond ybroȝt & scotlond al so
Al clene in riȝte to is wille an oþer he moste do
He spousede a noble wif gwenwar ire name was
Of þe heye kunne of rome no vairor womman nas

As sone as somer com to yrlond he gan wende
Vor to afayti þat lond & to winne ech ende
Gillam king of þe lond ar he þuder com
Volc as it were wiþ oute noumbre aȝen him he nom
Hii come & mette hom sone & gret bataile smite
Ac þe king arthure was aboue as me may wel ywite
& þe king gyllam was inome & so al þat lond
Bi certein couenant was in king arthures hond
Fram þanne he wende sone to þe lond of yrlonde
& wan it al clene to him & al þat he vonde
Þo such tydinge aboute com as ech sende oþer sonde
Þat so noble mon he was þat him ne miȝte no lond at stonde
Deldam wende anon to him þat was king of godlonde
& ginnas king of orcadas his grace for to fonde
& bicome is men & bihete him to bere him truage
Ech ȝer & holde of him & of his in seruage
Of þisse brutaine he was king & adde al so scotlonde
& yslonde & orcadas vnder him & yrlonde
Þo winter was al ydo to þisse londe he wende
To bringe þe lond in god pais & þe lawes amende
Tuelf ȝer he bileuede þo here mid nobleye ynou
& þe hexte men of mani londes aboute him uaste drou
& bigan to strengþe is court & to eche is mainie
Mid so gret plente huld is hous & mid so gret corteisie
Þat me ne miȝte of so noble los man neuer vnderstonde
& þat þer nas nour aboute kniȝt of none londe
Þat me tolde of eny þing bote hii of sute were
Of king arthures hous oþer som signe þer of bere
Of robes oþer of armes & þe gode mon was so hende
Þat he aueng vawe echon þat to him wolde wende