University of Virginia Library

Ac ouercome nas he noȝt þei is wounden dedlich were
Þo he adde is laste chiualerye þus nobliche ydo þere
He ȝef þe croune of þis lond þe noble constantin
Þe erl cadoures sone of cornwayle þat was is cosin
& he let him lede in to an yle vor to hele is wounde
& deide as þe beste kniȝt þat me wuste euere yfounde
& naþeles þe brutons & þe cornwalisse of is kunde
Weneþ he be aliue ȝut & abbeþ him in munde
Þat he be to comene ȝut to winne aȝen þis lond
& naþeles at glastinbury his bones suþþe me fond
& þere at uore þe heye weued amydde þe quer ywis
As is bones liggeþ is toumbe wel vair is
In þe vif hundred ȝer of grace & vourty & tuo
In þis manere in cornwaile to deþe he was ydo

Constantin was þo king after þe king arþure
Ac þe saxons sette aȝen him þe wule hii miȝte dure
& modredes tueye sones þe wule hii durste abide
Ac constantin hom to drof eyþer in is syde
Þen anne in to winchestre & þere wiþ sorwe ynou
In chirche at uore þe heye weued constantin him slou
Þe oþer fley to londone & þoru constantin al so
Þere biuore þe heye weued to deþe he was ydo
Conan slou suþþe constantin in þe þridde ȝere
At stonhenge he was ybured as is elderne were
Seint dauid deyde þer biuore bissop of walis
& þere he was vaire ybured in is owe chirche ywis
Constantines neueu aurely was king þo
& leuede in is kinedom tuo ȝer & nammo
Vortipor was þo king vour ȝer vnneþe
Þe saxons he broȝte al bineþe & monyon to deþe
Malgo com þo after him þat þe vairost king was
Þat me wuste euere in þis lond & al so þer nas
Strengore man bi is daye vor he wan ek to þis londe
Þe six yles þat beþ aboute & heoldis al an honde
As godlond & orcadas & al so yrlonde
Norþweye & denemarch & al so god yslonde

Carrik was king after him þat stalwarde man was
Ac to prout he was & to fals þat ssende þis lond alas
Vor þe saxons & englissemen were euere in þis londe
& adde aȝen þe brutons euere worre an honde
Þo hii seye þe falshede of þis king karrik
Hii wende after godmound þat was king of affrik
To helpe hom winne þis lond & bihete hom vaire ynou
Þe king godmound mid is ost hiderward sone drou
& mid an hondred þousend men & sixti þousend þer to
He com here mid þe saxons þis worre vor to do
Þe saxons & þat grete folc þat com so of affrik
Asaylede vaste þe brutons & hor king carrik
Mony bataile hii smite & sywede vpe him vaste
& fram toune to toune him driue so þat atte laste
Hii driue him to cirencestre & biseged him þer inne
Þen toun hii barnde vpe him ar hii him miȝte winne
Þere hii smite an bataile & suþþe hii driue ywis
Carrik in to seuerne west in to walis
Vor þe kunde men of þis lond recetted were þere
Euere wanne of straunge men yworred hii were
Þe luþer heþene volc barnde þo so vaste
& destruede al þis lond & þe tounes adoun caste
Wat mid fure wat mid suerd hii destruede al þat hii founde
Hii ne sparede prest ne chirche þat hii ne broȝte to grounde
Hii þat miȝte of scapie vaste flowe þere
To walis & to cornwaile & hudde hom vor fere
Þe erchebissop of londone & of euerwik al so
Þo hii seye þat cristendom to grounde was al ydo
& þe chirchen ycast adoun þe relikes hii nome ywis
Þat hii adde of holy men & flowe in to walis
Þe relikes nolde hii noȝt bileue ac bere wiþ hom vor fere
Vor raþer hii wolde ymartred be þan hii yperissed were
& in to þe lasse brutaine men flowe so þikke
So þat here nas noȝt bileued bote heþene & wikke
So þat fram norþ in to þe souþ no cristendom nas
Ne fram seuerne in to þe est se ac pur heþenesse was
Alas þe gode arþure to ver he was þo
His deþ broȝte to þis lond moche sorwe & wo