University of Virginia Library

Þe toun me clupeþ ludestoun þat is wide couþ
& now me clupeþ it londone þat is liȝtore in þe mouþ
& niwe troye hit het er & nou it is so ago
Þat londone it is now icluped & worþ euere mo

Engelond aþ ibe mid strengþe iwonne ilome
& verst as ich telle can þoru þe emperors of rome
After king lud þer was king his broþer cassibel
Þat noble prince was inou & þat lond gouerned wel
Iuly þe emperour of rome bi his daye com
& muchedel of þe world bi este to is poer nom
So þat he drou him westward & worrede in mony londe
& wan lond after oþer him ne miȝte non at stonde
Þo he adde iwonne france þe se he wende nei
& bihuld west & somdel of engelond isey
He eschte at men wat lond it were & wat folc þerinne was
Me sede him þat it was brutaine no betere lond nas
& þat þe folc was of troye & of brut icome
Þanne beþ hii quaþ þe emperour of þe kunde of rome
Vor after þe bataile of troye þe nobleman eneas
To lombardie com þat nou is rome & vre ferste fader was
& brut also com of him þat his fader slow
& þeruore was þenene idriue & to þulke lond drou
Þanne be we of one kunde ac bote ich þerto lie
Aȝen kunde hii beþ aȝen vs & of chiualerie
Vor þerof ne mowe hii conne noȝt Inot hou hii miȝte
To be bi hom sulue in an herne as þerof wiþ oute siȝte
Vor noȝt we ssolle hom ouercome ac naþeles as þe hende
We ssolle hom warni of oure þoȝt ar we þanne wende
Þe emperours messagers to engelonde come
Þat þe king abude is herte to þe noble stude of rome
As alle oþere kinges dude & is noble seruage
Dude to þe heye emperour & sende him is truage