University of Virginia Library

Henricus

Hii wende & auisede hom somdel vp an doun
Þat hii miȝte be war of hor fon & ise to toun
Some radde þat hii ssolde wende in at on hepe
To habbe inome hom vn armed & some abedde aslepe
Þe godemen sede þat hii nolde suich vileinie do non
Ac abide vort hii come Iarmed out echon
Hii houede vnder boskes & newe kniȝtes made
& armede & atired hom & hor bedes ȝerne bade
Sir simon de mountford conseilede hom vaste
Hou hii ssolde hom conteini þe wule þe bataile ilaste
Þo com þe ost smite out vaste out of þe toune
Mani was þe gode bodi þat þer was ibroȝt þer doune
Vor þe londreis þer biuore a gret despit wroȝte
To þe quene at londone sir edward þer on þouȝte
& vor to awreke is moder to hom vaste he drou
& brouȝte hom to grounde & some of hom al fleinde he slou
Þo he adde þis loundreis al ibroȝt to grounde
Wiþ gret Ioye he turnde aȝen ac lute ioye he founde
Vor þe barons were aboue & his alf ouercome
Þe king of alemaine was in a windmulle inome
Vor a ȝong kniȝt him nom kniȝt ymad þo riȝt
Sir Ion de befs icluped þat was suiþe god kniȝt
Þat muche prowesse dude adai & þe king him ȝeld in doute
To þe erl of gloucetre as to þe hexte of þe route
& to þe frere menors in to toun sir edward fleu vaste
& þere as he nede moste ȝeld him atte laste
Manion stilleliche hor armes awei caste
& chaungede hom vor herigaus somdel hii were agaste
& manie flowe in to þe water & some toward þe see
& manie passede ouer & ne come neuere aȝe
Aboute a four þousend & fif hundred me sede
Atte bataile were aslawe þat was a pitos dede
Sir philip basset þe gode kniȝt worst was to ouercome
He hadde mo þan tuenti wounde ar he were inome
Sir simond de mountfort þo ido was al þis
Vorþ mid him þe king huld as in warde iwis
& þe king of alemaine & sir edward al so
In þe castel of walingford in warde he let do