University of Virginia Library

De excidio troie & genelogia bruti.

Vor þer nas god kniȝt in mani lond ne stalworþe man
Þat in þe on side þere nas & al vor a woman
Þat heleine was icluped þis bataile verst bigan
An hei man was þer bi vore þat me clupede dardan
Of him com þe gode brut þat was þe verste man
Þat louerd was in engelond as ich ȝow telle can
Dardan biȝet troye þat god man was & wis
Troye byȝet priamus & also anchis
Þes were in þisse bataile of mest miȝt & mayn
Anchis biȝet enias & enias ascayn
Ascayn biȝet silvi of ȝwan þe brut com
Vor enias after þe bataile ascayn is sone nom
& silui ascaynes sone & oþere þat þer were
& to þe lond of lombardie wende & wonede vorþ þere
Þo silui hadde biȝete a child wane he wolde iwite
ȝwat man þe child ssolde be þat he adde bi ȝete
A clerc þorȝ enchantement him bigan þo telle
Þat þat child ssolde verst fader & moder quelle
& suþþe he ssulde mani lond over passi & wende
& mani bataile over com & suþþe at þen ende
To a noble lond he ssolde come and þere a louerd be
& kynges come of his blod & þat me ssulde ise
Þat eneas bi gan is of spring to lombardie verst bringe
Þre þousend & sixe & twenti þer was fram þe worldes biginninge
Þo þe clerc adde iseid his enchanterie
Þer vore silui him let sle ac þat was lute maistrie
Vor hit com no þe later as he hadde iseyd
Vor in travail of his beringe is moder was verst ded
Þo þis child was ibore me let hit clupie brut
Verst louerd he was in engelond of ȝwam me spekeþ ȝvt