University of Virginia Library

Henricus

Sir alein was ek inome in monekene wede
In þe priorie suþþe arst he was in drede
& vor sir willam mautrauers hom let so quit gon
Sir simond nolde nouȝt deliueri hom sir Ion
To þe forest of dene sir Ion wende þo
& turnde aȝe sir simond & procurede oþer mo
Lewelin prince of walis robbede mid is route
Þe erles lond of gloucetre in walis aboute
Þo wende þe erl fram londone priueliche & stille
As to socori is lond aȝe sir simondes wille
In þe forest of dene to gadere sone hii come
He & sire Ion giffard & stable conseil nome
To holde aȝe sir simond stabliche hii were at on
& boreforde & beghwurþe þe erl ȝef sir Ion
Wiþ him to holde stabliche aȝe sir simon in ech cas
Sir roger ek de mortimer in is owe londe was
In þe contreie of wigemor & wuste him vaste þere
Prest wan he seie time baner vor to arere
Seue baners also þat aȝe sir simond were
In þe castel of bristowe hulde hom vaste þere
As sir warin of bassingbourne man of gret los
& sir roberd tipetot sir Ion de mussegros
& sir pain de chawurþe & sir patric is broþer
& þe oþer banerets & kniȝtes mani oþer
Þe king sende ofte is lettres þat hii deliueri ssolde
Þe castel vp sir simond & naþeles hii nolde
Atte laste sir edward is lettres hom sende
To ȝelde vp þe castel & þat hii þanne wende
Þo was among hom deol inou vor hii ne dorste leng abide
Hii ȝolde vp þe castel & wende ech in is side
A certein day hom was iset of londe vor to fle
& sir roger ek de mortimer deserited vor to be
Sir simon de Mountfort out of warde nom
Sir edward him to solaci þat to lute þonc him com
He bitok him sir henri is sone to be is compainoun
Wiþ him to wende aboute to sywe him vp & doun
So þat after estre þe king & sir simoun
Wende hom toward þe march to bringe hor fon adoun