University of Virginia Library

Henricus

Þe legat þere asoilede heye & lowe al so
Of homage þat hii adde þis lowis ido
He made ek seue bissops vor nammo þer nere
& erles & barons & kniȝtes suerie þere
Holde oþes þe ȝonge king þat hii him treuþe bere
& amansede alle of engelond þat aȝen him were
Manie in hor bare fless hom lete croici vaste
To libbe uor him & deie lowis out to caste
Heyemen of engelond þat mid lowis were
Vor kundede hor herte to king henry bere
So þat anon to somere hii gonne to vrne vaste
& þe eue of þe trinite hii mette hom atte laste
A sein dunstones day at lincolne iwis
& smite þer an bataile þat wel couþ is
Ac so it was þat englisse þat mid Lowis were
Toward king henri & is muche hor herte bere
& þo it com to þe strengþe hii fouȝte feinteliche
& inome were of hor frend & hii ȝolde hom liȝtliche
So was þe erl of winchestre sir saer de quinci
Inome & of hereforde þe erl sire henri
& sir Roberd le fiz water & mani oþer al so
& mani was þe gode bodi þat þer was to deþe ido
Vor þe ȝonge erl of peithes þun deþ þere nom
Þat was iholde ȝong kniȝt þe beste of cristendom
He nas þo bote of þretti ȝer þe erl marchal him slou
Wan tueye stronge comeþ to gadere it is somdel tou
Þo lowis hurde telle þat is men bineþe were
He wende him to londone & huld him vaste þere
Socour fram biȝonde se to abide in þulke place
Tuelf hundred ȝer & seuentene þis was of ȝer of grace
So þat gret poer of france dude hom in þe se
Aboute an hundred ssipuol ac hii ne come noȝt alle aȝe
Vor sir Richard fiȝ le rei þe kinges sone Ion
& sir huber de boru & oþere kniȝtes manion
& þe sink pors scarseliche mid ssipes eiȝtetene
& ȝeue hom bataile in þe se þat was sone isene
Vor sir Eustas þe moine was þere to deþe ido
& mani oþer of france & þer were inome al so
Ten grete louerdinges & oþere manion
So þat inome oþer aslawe oþer adreinct hii were echon