University of Virginia Library

Edmundus

Þe king knout was so debrused þat he stod vnneþe
He dradde wanne he lore þat lif & were ybroȝt to deþe
He adde leuere þan eni þing þat hii acorded were
Ac he ne dorste is feblesse telle edmund vor fere
Laste ȝif he vnderȝete þat he were so ouercome
Þat he nolde fine ar he adde is lif him binome
Þo he him adde an wule yrest is armes he gan to caste
& wiþ gret ernest step ner & asailede edmond vaste
Mid al þe strengþe þat he miȝte & ssewede more þer to
& al uor he ne ssolde wene þat he were ouercome so
Þis knout bigan to reste þo is asaut was ydo
& bed edmond as in pes a word hure oþer tuo
King edmond him grauntede & somdel him wiþ drou
& lenede vp is sseld & herknede him ynou
Ichabbe quaþ knout ywilned þi kinedom ar þis
& nou wel more þan þi lond þi sulue ich wilni ywis
Vor þou nart noȝt one worþe be of engelond king her
Ac to be prince of al þe world uor in þe world nis þi per
Ich abbe al þat lond of norþweye & of denemarch anhonde
Ine wende noȝt þat eni mon min dunt ssolde atstonde
Ac þou ne atstonst it noȝt one ac art al clene aboue
Ware uore ich desiri mest þin grace & þin loue
Þat þou of alle min londes me be felawe & per
& ich mot ek of engelond be þi parciner
Vor ȝif we to gadere beþ & al clene of one rede
Norþwey & ech oþer lond & ech prince vs wole drede
Þeruore ich biseche þe haue half mi lond mid me
& ich as þi parciner half engelond mid þe
Edmond þo he hurde þis is grete herte wiþ drou
& ensentede to is red & bi com milde ynou
& abuide to is milde word þat mid suerd was aboue
Hii caste awei sseld & suerd & turnde al to loue
& biclupte hom & custe & hor folc in eyþer side
Þo hii seye hom acorded uor ioye loude hii cride
& songe te deum laudamus eiþer in is route
& to gadere wende & custe hom ech oþer aboute
Bi tuene þis tueye kinges was a certein fourme ydo
& forewarde among al hor folc ar hii departed atuo
Wat eiþer adde to is del of lond & oþer þinges
& departede wiþ loue atuo & bileuede boþe kinges