University of Virginia Library

Þat it þoȝte þat al þe hul mid þe vallinge ssoc
Þo stod þe king & lou & þei ech lime him ok
Vor he was wery yfaȝt bedwer he bed þere
Þat he corue of þe grislich heued & to þe castel it bere
So þat hii come to hor felawes in þe dawiinge
So noble los nas neuere yhurd as me bar þo þe kinge
His men truste þe bet to him & mony a blessinge
He adde uor he deliuerede men of an so voule þinge
Þo king arþures men ycome were echon

Sone hii drowe hom to ward france vor to seche hor fon
Hom com tydinge þat þe emperour of rome ycome was
Mid so gret folc him to seche þat such neuere yseye nas
Þeruore nas noȝt þe king adrad ac vorþore he wende by syde
& bigan to picche is pauilons him vor to abyde
Þe erl of oxenford he nom & an oþer erl al so
& sire wawein is soster sone þo al þis was ydo
& to lucye þe senatour in þis manere hom sende
To hote him þat he hasteliche out of france wende
Oþer þat he com amorwe batayle uor to do
Vor to cuþe weþer adde betere riȝt þer to
Þis noble kniȝtes wende vorþ & hete lucye al so
Vor to wende out of france oþer þe batayle do
Quintylian is neueu ansuerede atten ende
Þat he nas noȝt þuder ycome out henne uor to wende
Ac to gouerni france þat of riȝte of rome was
& þat bote ȝelpinge & bost mid brutons noþing nas
Sire wawein þe gode kniȝt was þo wroþ ynou
& among al þat folc hupte ner & is suerd adrou
& smot of þat heued anon & þat heued wiþ him nom
& wiþ is felawes to is hors vor hom alle ȝut he com
Ac wat an horse wat auote þe romeyns hom sywede ynou
Vor to awreke hor grete mayster þat sire wawein slou
Geryn erl of carcoys þat mid king arþure was
He biturnde him þo he sey þe romeins luþer pas
& on þoru out þat body he smot mid is lance
Þe erl of oxenford ek þoȝte of is cheance
He biturnde him & mid is launce þoru þe þrote smot on
& þus þis þre gode kniȝtes sturede hom among hor fon