University of Virginia Library

Erl Ion is broþer bisende him al so
& bisouȝte is grace of þat he adde misdo
So þat þe king þoru gode men is grace him ȝef þere
& in gode fourme acorded hii were
Þo þe king adde normandie in god stat ibrouȝt al
Þut lond he tok to loke willam þe mareschal
Þat was erl of penbroc & is broþer erl Ion
& wende wiþ is poer to aquitayne anon
Þere he broȝte al bineþe hom þat were is fon
So þat he adde al in peis is londes echon
& nobliche wuste is londes & nobel kniȝt was
Atte laste he deide in a pitous cas
Vor as he wolde at limosin bi sege þe castel
& he com þer aboute Iarmed nouȝt uol wel
Þe morwe after seinte marie day in leinte wiþ a quarel
Issote he was þat he ne et neuereft a god mel
Þe tuelfte day he deide of aueril þe sixte day
Bi is fader he was ibured as is fader lay
Riȝt at is fader uet in þe nonnerye
Of fount ebraud richeliche þat is in normandie
Endleue hundred ȝer of grace & ninti & nyene
Þus þe noble king richard broȝte is lif to fine

I on king richardes broþer after is broþer deþe
Ne abod noȝt wel longe seue wouke vnneþe
Ar he let him crouni king an holi þorsday iwis
At westmunstre in þe abbeye as þe riȝte crouninge is
Of þe erchebissop of kanterbury hubert þat was þo
Þer after deide sein hue an half ȝer & nammo
Þat was bissop of lincolne & þer after þe werste ȝer
Þe ordre bigan of frere prechors þat nas neuere er
Sein dominic it bigan þo in þe ȝer of grace ywis
A þousend & tuo hundred ȝer vor nammore it nis
Þulke ȝer þe king him let vor sibrede to dele
Fram is wif þe contesse of gloucetere ysabele
& spousede anoþer wif Isabele het ich wene
An grete erles doȝter & let hire crouni quene
Þe ȝonge erl of brutaine arþure hadde riȝte
To be king of engelond þeruore mid al is miȝte
He orn vpe þe king ion bi ȝonde se vaste
& he & sir hue de brun come atte laste
& sire geffray de limesi & þre hundred kniȝtes al so
& elianore þe olde quene bisegede in peyto
In þe kinges o castel it com þe kinge to ere
He wende to is moder to deliuery ir þere
& nom þere þis arþure & þe hexte þat mid him were
In tuelf hundred ȝer of grace & þe secunde ȝere
Þo þat king arþure ne com nammore aȝe
Me sede uor is eritage þat þe king him let sle
Vor þis slaȝt þe king of france orn vpe þe king Ion
& is londes biȝonde se seisede anon
Aquitayne & normandie so þat hii ne come nammore
To þe croune of engelond & þat was to rewe sore
Þis sunne & oþer mo king Ion sore aferde
So þat þe abbeye of beulu of greye monekes he arerde
& þe baronie of farendone & oþer londes ȝef þer to
In tuelf hundred ȝer of grace & foure þis was ido
Þe nexte ȝer þer after deide þe olde quene
& hubert þe erchebissop of canterbury ich wene
& peres de la roche was bissop of wincetre ywis
& þe king made peni chaunge In o ȝer was al þis
Þo þis peris was ichose he wende uor þis cas
To rome & of þe pope þere isacred was
Fram rome he broȝte an heste þat me here nome
Petres peni of ech hous þat smoke out of come
Ac þe king & heyemen wiþ sede it ilome
War þoru þe king adde þe worse grace at rome
Of þe erchebissop of kanterbury þer wex a striuing
Weþer him ssolde chese þe couent oþer þe king
Þe sousprior of hor hous þe monekes chose echon
& þe king ches þe bissop of norþwich þat het Ion
To rome hii were boþe isent þis louerdinges tueye
To be isacred of þe pope ac he vorsok hom beye
Ac maister stefne of langetone ibore of engelonde
He made erchebissop & sacrede wiþ is hond