University of Virginia Library

Henricus

Sir faukes þat fleu aboute wide gan to fle
Atte laste he was ifounde in þe churcde of couentre
Þe churche sauede is lif ac villiche inou
He uorsok þe kinges lond & to is owe contrei drou
Þo was þe king him þoȝte quit of al is fon
Of god stat to þe lond he spek þo anon
Vor þe gode olde lawes of wan we abbeþ ispeke
He confermede vaste þo þat me ne ssolde it breke
& made þer of chartres on ich vnderstonde
Of þe forest & anoþer of franchise of þe londe
& aselede is boþe & þe erchebissop þere
& oþer bissops amansede alle þat þer aȝen were
It was tuelf hundred ȝer of grace & fiue & tuenti þere
Þer uore þe men of þis lond gret raunson him bere
Þe vifteþe peni of al hor god & blake mones iwis
Vnder al to þousend marc him ȝeue uor al þis
& þe giwes vif þousend marc iconfermed it was vaste
& ȝut as me ssal ihure lute wule it laste
King lowis of fraunce & willam þe longespei
Þe eldore deide suþþe as in oȝer ney
& after king lowis com is holi sone lowis
& after him com is sone willam þat was so wis
Þe gode erchebissop steuene broȝte is lif to fine
As in tuelf hundred ȝer of graee & tuenti & nine
& maister Richard þe grant in is stede was ido
& wende uorþ to rome to sacri him þer to
Þe king wende to brutaine mid gret ost þulke ȝer
Vor to winne aȝen þing þat is fader les er
Ac he wende hom aȝen in þe uerste ȝere
& bileuede þe erl marschal & þe erl of chestre þere
Vor to winne is riȝtes uor him sulf lute he wan
In brutaine deide þo Gilebert þe nobleman
Erl of gloucetre & richard is ȝonge sone was þo
In þe kinges warde uor he was of eiȝte ȝer & nammo
& sir peris de roches bissop of wincestre
Þe king ȝef þe warde of him & of þe erldom of gloucestere
Richard erl of cornwaile þe nexte ȝer after þis
As in tuelf hundred ȝer of grace & on & þritti iwis
He spousede þe contesse ysabel þat þe childes moder was
Willam þe erl marschal deide þulke ȝer alas
& at londone was ibured & Richard is broþer
Vnderueng þe eritage vor he nadde eir non oþer
Þe king him vaire vnderueng & þe erldom of penbroc
& al is oþer eritage wel vaire him tok
Randulf þe noble erl of chestre deide suþþe al so
As in tuelf hundred ȝer of grace & þretti & to
Sir hubert de boru erl of kent þe noble iustise
Þat as þe kinges poer hadde an alle wise
Acused was to þe king of mani luþer prise
So þat he was in prison in þe castel of þe vise
& was bitake four erles to witie wiþoute faile
Þe erl of wareine & Richard erl of cornwaile
& Richard þe marschal & þe erl of chestre Ion
So þat hii founde kniȝtes ech of hom on
To witie him in prison & ȝut uor echon
He of scapede to churche as him þoȝte best won
Wiþ strengþe he was out idrawe & suþþe to þe castel
Of scorgoil he was ilad & iwust þere wel
Vor he was of churche inome þo clergie bispek it vaste
So þat he was þoru þe pope deliuered atte laste
Sire steuene of segraue was imad þo hei iustise
In sire hubertes stude de boru þut lond wel to wise
Þo sprong þer a gret contek & strong þoru out al
Bituene vr king henri & richard þe marschal
& sir gilberd basset & sir richard stiward þer to
Vor to uor sir hubert de boru & uor þe bissop al so
Of winchestre sir peris de roches uor þe king as me sede
Dede þoru is conseil mani luþer dede
As in tuelf hundred ȝer of grace & þritti & þre
Aȝe þis þre louerdinges þe king gan luþer to be
Destruede hor londes ouer al & dude hom ssame inou
Ac þe erl Richard þe marsschal soffrede euere inou
& vaire þe king bisende þat he him ssolde wiþdrawe
Bi men of religion & al nas wurþ an hawe
Þo þer nas oþer red he wende to walis
& ber him þere vaire inou & lute dude amis
Vor þe kinges londes þer he miȝte abbe al destrud
Ac vor he ne dude is felawes were wel sore anuid
Ac sire gilebert basset & sir Richard syward
Hii destruede þere vaste inou & suþþe hiderward
Þe kinges conseilors londes hii destruede mid hor tayle
Ac þe bissop of winchestre & þe erl of cornwaile
& nameliche þe bissops vor sir Richard siward vaste
Barnede is courtes oueral & walles adoun caste
So þat maister edmund of abendone was
Erchebissop of canterbury as god sende þat cas
As tuelf hundred in ȝer of grace & four & þretti also
Þis holi man seint edmund in suich poer was ido
Þo wende Richard þe marschal þat of penbroc erl was
Into irlonde to worri in luþer time alas
Vor þoru treson of is owe men to bataile he wende adai
So þat þe ost of is fon ouer muche he sai
& muche of is owe folc bigan vor to fle
Sire quaþ þo þo kniȝt þou most þe bi se
Þou sucst þis folc ouer muche þat aȝe þe is
& þin owe ouer lute betere it is iwis
As me þincþ turne aȝe uort god sende betere iwon
Vor vr poer is to lute aȝe þus manie fon
Wat seiste quaþ þis gode erl wan richard þe marschal
Vpe is stede iarmed is & atiled þoru out al
& toward is fon in þe feld haþ is wombe iwent
Ssold he turne hom is rugh he nas neuere so issent
Vor he ne dude it neuere ne neuere iwis ne ssal
Fram such ssendnesse crist ssulde Richard þe marssal
As noble bodi in he smot he nolde longe abide
He slou to grounde her & þer vaste in eiþer side
More prowesse ne miȝte of o bodi be
Þan me miȝte of richard þe marschal þere ise
Hii ne miȝte him one felle al þat to him drowe
Ar hii mid som felonie is stede vnder him slowe
& ȝut ne miȝte hii him ouercome ar on him smot bicas
In aboute þe fondement as he vnarmed was
& so vp toward þe gottes & þus was of lif dawe
Richard þe marchal ibroȝt & þoru treson aslawe