University of Virginia Library

& at huld al hor god & let hom al bar wende
& ȝut him of þoȝte sone þat he was hom so hende
Mid hor gold & seluer & mid hor tresour hii miȝte
Sousteini a god ȝuile is ost aȝens hom wor to viȝte
& ȝut þis luþer false men in þe se come
& tornde aȝen to suikedom & an oþer red nome
Atte hauene of tottenays hii gonne arst ariue
& dude hom alond & robbede in deuenissire bliue
& so vorþ in somersete moche wo gonne do
Al anon to seuerne & to baþe al so
& bisegede þene toun ac wiþ oute hii were
Vor þe king bi norþe was hii gonne hor werre arere
Vor þe king was toward scottlond & awreke him he þoȝte
Of scottes & of picars þat euere euele him wroȝte
Þo þe tyding him com of þe saxons is fo
He nuste in weþer ende turne so uol he was of wo
Of scottes he wolde awreke be ȝif time him þer to ȝeue
Ac he nolde uor no þing þe saxons bileue
& howel is soster sone king of þe oþer brutayne
Mest in is herte was uor anguysse to playne
Vor he lay binorþe sik þat he ssolde bileue him þere
Leste þe scottes him dude ssame oþer þat he þe wule ded were
He bileuede him poer ynou & toward somersete
Wende toward þe saxons vor þat nolde he noȝt lete
Þo he com to somersete & þe saxons ysey
He houede & spac wiþ is men þes wordes al an hey
Vor þis luþer saxons abbeþ gret dedeyn
Vor to holde me treuþe ȝif ich abbe eny mayn
Icholle holde to ihesu crist treuþe ȝif ich may
& þat blod of my kunde folc awreke ȝut to day
Armyeþ ȝou nou hasteliche armeþ ȝou anon
Vor we ssolle to day mid godes help ouercome vr fon
Ac þe king atte biginninge let hangy echon
Hor ostages uor þe treson he ne bileuede noȝt on
Þo þis gode folc ȝare was in batayle to Ride
Sein dubric þe erchebissop of carleon gan abide
& wende vp a lutel hul amidde þe compaynie

Ȝe cristinemen he sede of so noble seynorye