University of Virginia Library

Welle þat þis luþer quene anguisous was þo
Þat child heo hente vaste anon he ne moste an vot go

Ȝerd ne vond heo preste non þat child uorto bete
An hondfol heo hente of condlen longe & grete
Þat child heo bet so stronge mid þe condlen longe & towe
Heo ne bileuede noȝt ar he lay at hire vet yswowe
War þoru þis child afterward such heymon as he was
Was þe worse wan he ysey candlen vor þis cas
Wat halt it to telle longe þis child me made king
Ac sein dunstan wel vnneþe wolde do þe sacring
Vor þe godemon spek ȝut þerof wel longe þer biuore
Þo he baptised þis aeldred sone so he was ybore
Vor þat child fuled in is hond þat water & þe vantston
Biuore bissops þat þer were & heyemen monyon
& dude is kunde fulþhede seint dunston sede anon
Þat he ssulde of sunne encheson be & of wrecchede monion
& þo he ssolde king be þis godemon seint dunston
Hatede muche to crony him ȝif he it miȝte vorgon
Ac þo he it moste nede do þoru pur londes lawe
Sire king he sede uor þou art mid vnriȝt her to ydrawe
Vpe þin owe heued it ssal come þi moderes luþer plawe
Þoru ssedinge of þi broþer blod þat þus is ybroȝt of dawe
& uor englisse men were wel ypayd
In ssedinge of þi broþer blod þat so was bi trayed
Þeruore hor poer ssal al clene hom be bi nome
& þou al so uor strange uolc of strange londe ssal come
& þis lond worþ in seruage & to grounde ybroȝt
& al þat ssal come bi þine daye & bi myne noȝt
& atte laste vr louerd wole of hom vnder stonde
& al þis word to soþe com suþþe to engelonde

Ȝut elfred þe luþer quene þat seint Edward slou
Of ire trespas biuore ire deþ repentant was ynou
& rerede tuo nonneryes worewelle þe on was
& ambresbury þat oþer to bete hire trespas
& adde grace ȝif god wole hir sunnes vor to bete
& com to god amendement ar heo þat lif lete
Þe þridde ȝer as it wolde be of aildredes kinedom
Þe biginning of þis sorwe to engelonde verst com
Vor of þe volc of denemarch þer ariuede þo
Atte hauene of souþhamtone seue ssipuol & nammo