University of Virginia Library

& þoru king aþelston þat was verst ydo
Men of cornwayle he broȝte to certeyn stude al so
Vor biȝonde þe water of tamer he hom adde alle ybroȝt
To wonye þer as in hor owe & a þis alf noȝt
Vor hii wonede þer biuore anon to excestre riȝt
& þe welisse ver in engelond vorte he it adde ydiȝt
King aþelston louede moche malmesbury ywis
He ȝef hom of þe holy croys som þat ȝut þere is
& he was at is ende day vaire ybured þer
King he arst adde ybe aboute an viftene ȝer

Edmond aþelstones broþer after him was king
Godmon & doutede god þoru alle þing
In þe ȝer of grace it was nyen hondred & fourty ȝer
Þat he was king ymad & old he was er
Eyȝtetene ȝer he was king & six ȝer & a day
Vour & tuenti ȝer he was old ar he aslawe lay
Saracens þat were þer ȝut bileued in engelonde
In lincolne & in leycestre & in derby ich vnder stonde
In stafford & in notingham he hom drof al to noȝte
& cristine men aboute in hor studes broȝte
Þat hous of glastingbury he louede wel ynou
& made seint dunston abbot þer & to is conseil him drou
& þoru is conseil chirchen wide he let rere
& abbeys & prioryes aboute her & þere
Into þe hous of glastingbury gret þing he ȝef þo
& gret franchise hom grantede þat lasteþ euermo
Þat hii adde hor franchise as veruorþ as þe king
& mid god chartre þat ȝut is þer made þe conferming
Edwyne is sone was þat luþer was ynou
& Edgar þe ȝongore þat to alle godnesse drou
King Edmund atte laste mid luþer deþes wounde
Pitosliche was aslawe alas þulke stounde
Vor a traytour of is lond lof was is name
Yflemd was out of engelond mid wrecchede & ssame
Suþþe aday as þe king sat at is mete
At pokelchirche bi side bristowe & somdel adde yȝete
Lof þis luþer traytour mid is cloþes ychanged þere
Com in & biuore him et anoþer mon as it were