University of Virginia Library

Gorgont rex.

Hii dude hom vorþ in to þe se & bi moni a londe wende
So þat in to spaine atte nende hom sende
Þere hii bileuede & woxe & alle þat of hom come
Vorte now þis oþer day þat we ne miȝte noȝt be isome
Vor þe kunde volc of þe lond adde to hom onde
& þat we to grete maistres were driue us out of londe
Oþer half ȝer we abbeþ now iwend wiþ oute reste
In þe grete se of occean vorto seche oure beste
Þat oure owe lif ous is loþ þat we nuste ware bileue
Þer vore we wolde bidde þe þat þou vs som place ȝeue
Þat were ampty In þine londe ware þou wost bi þenche
Þat we miȝte biswinke oure mete & libbe bi oure swenche
Þe kyng hom nolde granty no þing of is lond
Ac he sende hom bi god condut In to yrelond
Þat al ampty was of men þat no mon ne wonede þere
& þis were þe verste men þat in yrlonde were
A þousend ȝer hit was & tuo þat ido was al þis
After þat folc of israel of egipt wende iwis
Seue hondred ȝer & nyenty hit was ek biuore
Er þan oure louerd crist anerþe was ibore
Hit biuel þerafterward suiþe long inou
Þat out of þe lond of scicye oþer folc þuder drou
Vor in to þe grete se of occean a gret compainie
Of picars wende some time out of scicie
Fram londe to londe wide hii gonne wende
So þat hii come attelaste to yrlondes norþ ende
Aȝen þat folc of scotlond & þat folc þat hii founde þere
Of þis eldore kunde scottes icluped were
Þe picars bede þe scottes an ende of hor londe
To ȝiue hom to libbe by bi suench of hor honde
Þe scottes sede þat þet lond noȝt inou be
To hom boþe to libbe by as hii miȝte ise