University of Virginia Library

Henricus

Bi seuerne wende þer sone he it nom
& þerinne bi þe water in to þe castel com
Anon so he was wiþinne vpe þe tour an hey
He arerde is baner þat me wide isey
Þo þe baruns þat isei sori hii were echon
In þe toun half þun castel hii asailede anon
& hii wiþinne casten out mid hor ginnes vaste
So þat bituene hom þe biker longe ilaste
Sir Ion giffard fram brumesfeld þuder sone com
To þe castel med wiþoute toun þun wei sone he nom
& þe castel brugge out of þe med he barnde fram þen ende
To þe tubrugge along vor me ne ssolde out wende
Mani was þe vair biker & þe vair asaut al so
Þat bituene þe castel & þe toun ofte was ido
Sir edward & is poer ofte were wiþinne
Vpe þe point to smiten out bataile to biginne
Ac þe bissop water of wurcetre ofte bituene wende
& þe abbod reinaud of gloucetere as god hom grace sende
& destourbede þe bataile ac non acord þer nas
Ac biker & slaȝt & ssetinge bituene hom ofte was
So þat sir edward aday & is men hom lete arme
To wende out & bataile do al mest to grete harme
Þo seie hii out of þe tour þe erl roberd of ferers
Atte tounes ende come wiþ noble men & fers
As framward teuskesburi iarmed wel echon
Hors & men al preste bataile to do anon
Þo sir edward þis isey no þing nas he glad
Vor me sede þat he nas of noman so sore adrad
Vn iarmed out he wende to þe barons wel stille
& anon made acord & graunted al hor wille
& made fourme god inou & suor is wel to holde
Þo hii adde al hor wil þe barons were wel bolde
Þe erl roberd of ferers þo he þuder com
He was nei uor wraþþe wod þat me eni acord nom
He smot stede wiþ þe spore & al is compainie
& wende him vor wraþþe aȝen so quic so he miȝte hie
Ech bar him ek amorwe out of toune drou
& of þe fourme þat hii made wende be siker inou
Þo sir edward & is folc were al maistres þer
Vor þe burgeis of þe toun lete in baruns er
He let crie in to al þe toun þat bourgeis þat wolde
In þe castel come to is peis god pais habbe he ssolde
Gladdore nere þe borgeis neuere in hore liue
Þan vor þis gode word hii hiede þuder bliue
Þo hii were alle icome þe ȝates me made vaste
& brouȝte hom biuore sir edward þo were hii sore agaste
Me acoupede hom harde inou & suþþe attelaste
As þeues & traitours in strong prison me hom caste
Wiþoute mete & drinke þere hii laie longe
In sorwe & care & lokede wan hii were anhonge
Sir roger of clifford þe porters vaste nom
Þat porters were atte ȝate þo Ion giffard in com
As hobekin of lodelowe & is felawes al so
& let hom vpe þe west ȝate anhonge boþe to
Euere lokede þis burgeis wan hii were vorþ idriue
Prestles hom was wel wo þat hii nere issriue
Roberd of caumpedene þat hosebonde was on
Vor he was a lute clerc he ssrof hom echon
Atte laste sir edward of hom gret raunsoun
Nom & let hom go aliue & destruede al þen toun
Ac þe fourme þat he made aȝe þe barons biuore
He bileuede al clene þei þe oþ were isuore
To oxenford he wende vorþ as is fader was þo
& is men bi þe weye dude wel muche wo
Þe king sone in leinte to oxenforde com
& is in wiþ is folc atte frere prechors nom
Aboute an þre wouke þere he gan abide
Vor to gaderi is ost þat isprad was wide
Suþþe seinte freþeswiþe was me nuste king non
Þat wiþinne þe ȝates of oxenford dorste ride ne gon
Þe king was among þe freres & hii manion
Radde him vor to wenden in & nameliche frer Ion
Of balsam & þat he miȝte þoru godes grace hii sede
In wiþ god deuocion go wiþoute drede
Þe king hadde þer to g[o]de wille þoru frerene rede
& hii massen & orisons uaste uor him bede
So þat vastinde a day a uote he dude þis dede
& in eiþer half to sikeri him freres him gonne lede