University of Virginia Library

Henricus

So þat sir roger de clifford & sir Ion giffard nome
Gret poer in somer & to gloucetre come
Hii sende to sir maci þat he þun castel ȝolde
To hom & to þe baronie oþer hii him nime wolde
Sir maci hom sende aȝen þat þe king him tok biuore
Þun castel him to loki mid trewe oþ isuore
Ne þat he nolde traitour be ne þen castel neuere ȝelde
Bote þe king oþer is sone þe wule he him miȝte welde
He adde wiþinne lute folk þun castel to defende
Arblastes sone & ginnes wiþoute me bende
& ssote inward vaste inou atte laste hii sende
Al þe brutaske wiþoute & þe brugge brende
Vor he was al of tre & sir maci & his
Flowe in to þe tour an hey þo hii seye þis
& defendede hom vaste þe wule hii miȝte iwis
Ac vor defaute of helpe mani man issend is
Wiþ an quarel on wiþinne an squier þer oute slou
Sir Ion giffard uor is deþ made deol inou
& þo sir maci was inome & hii wiþinne come
An carpenter þat hii sede þat sset þe ssute hii nome
& ladde him vpe þe tour an hei & made him huppe to grounde
He hupte & debrusede & deide in an stounde
& sir Roger of clifford þo þe castel in warde hadde
& hii nome sir maci & in to marc him ladde
& sir Ion giffard nom to him is quic eiȝte echon
& al þat he fond of is & nameliche at sserston
A freinss bissop þer was at hereforde þo
Sir peris de egeblaunche þat hii dude al so wo
Hii come vor to nime him Iarmed manion
Þe godeman vor drede to churche wende anon
& reuestede him bi þe auter ac sir roger ne sir Ion
Vor honour of holichurche nolde wiþinne gon
Ac sir tomas torbeuille & oþer ssrewen mo
Wende vp & wiþ strengþe made him out go
Þo he sei þat he ne moste habbe churche peis
Par crist he sede sir tomas tu es Maveis
Meint ben te ay fet vor he adde muche god
Þer biuore him ido & he it vuele vnderstod
Hii harlede him out of churche þat lute pite adde
& is god nome vaste inou & to erdesleye him ladde