University of Virginia Library

A strong castel þer is nou ac þo nas þer non þere
Longe þoȝte seint edward at is broþer ar he were
An vewe men mid him he nom & þuderward gan Ride
His men pleyde bi þe wey & spradde aboute wyde
So þat þis holy king al one was sone
& alone wende vorþ as he þoȝte to done
Þo is luþer stepmoder al one ysey him come
Heo þoȝte do hire wille of him as heo adde hire red ynome
Þo þis holymon was ney ycome þe quene aȝen him ȝeode
Wiþ noble mayne ynou & gret loue him gan beode
Þe feste þat heo wiþ him made no tonge telle ne may
Heo suor þat he ssolde aliȝte & bileue wiþ hire al day
Certes ma dame quaþ þe king so ne may it noȝt be
Ac lat me speke mid my broþer vor me longeþ him to se
Vor ar ich him abbe yseye ine worþ noȝt bliþe ywis
Min herte is so moche on him & no wonder it nis
A sire quaþ þis luþer quene wanne it ne may oþer be
Verst icholle to þe drinke & suþþe þou ssalt him yse
As me him drinke tok on was prest ynou
& þoru is wombe smot a knif & is gottes to drou
A long knif it was & smal ynou as me may ȝut yse
Atte churche of kaueresham as he aþ ȝare ybe
Þis holi man sat vpriȝt & ysei is deþes wounde
He ne rod bote lute wey ar he vel to grounde
& let þere is suete lif & to heuene wende
Awey lute vuel þoȝte he þo me is wombe rende
Þo þis holymon ymartred was hii þat him broȝte þer to
Biþoȝte hou hii miȝte best mid þe holy bodi do
Hii porueiede an derne stude & þer inne hit caste
Villiche & stilleliche & burede it þere vaste
Þo þis dede was al ydo þe quene adde al ire wille
Vor me halt euere mid þe quike þe dede was sone stille
Seint Edward þe vifte ȝer of is kinedom
Aȝen eue aday aslawe was in such martirdom

Aeldred þe quene sone þat king was ymad þo
Nas bote of ten ȝer old þo is moder dude þis wo
Ne of þis dede nuste he noȝt bote as god ȝef þat cas
In þe luft he hurde an hey as he al one was
His broþer þat was aslawe pitosliche grede
Þat child criede & sore wep & is moder þat cas sede