LXXXII.
[1]
God, wha like to þe be sal?
Ne stint ne blinne, god, with-al.
2
For loke, þine faas dined ai,
And þat þe hated heued vphoue þai.
3
Ouer þi folke liþhered þai rede,
And ogaines þi haleghs thoght þai quede.
4
Þai saiden: “comes nou to ga,
And fra folke forlese we þa,
And be mined sal na dele
Ouer þe name of Iraele”.
5
For þai thoght hali samen ai,
Ogaines þe bi night and dai
Witeword set þai, for [to] wite:
Teldes of Idume and Ismaelite,
6
Moab, Agariene, Gebal,
Amon, Amalech with-al,
Outen als of oþer land
In tounes ofe Tiri ware wonand;
7
Sothlike Assur with þam come he,
In helpe of sones of Loth to be.
8
Als Sisar and Madian make to þa,
Als Iabin in scaldand Cyson, swa—
9
Þai forworthed in Endor,
Þai ere made als thoste of erthe þarfor.
10
Als Oreb set þe princes of þa,
Als Ȝeb and Ȝebee and Salmana;
11
Alle þar princes whilke saiden he:
”In eritage goddes halines hagh we“.
12
Mi gode, als whele set þam,
Als stubble bifore wind lickam.
13
Als fire þat brennes wode, swa,
Als lowe swiþand hilles ma,
14
Swa in þi storme filghe þas þou sal,
And in þi wreth todreue am al.
15
Fille þar face with schenschip ai,
And þi name, lauerd, seke sal þai.
16
Þai schame and be let in werld of werld swa,
And þai be schent and forworthe þa;
17
And þai knawe þat name to þe, lauerd is;
Þou ane heghiste in alle erthe þis.
