XXXV.
[1]
Þe vnrightwis saide with tunge hisse,
Þat in his-selfe noght gilte misse;
Noght es drede of god to be
Bifor his eghen for to se.
2
For swikelike dide he in his sight isse,
Þat be fonden at hatereden wicnes hisse.
3
Wordes of his mouth þat ga,
Wickednes, swikedome als-swa;
He ne wald noght vnderstand,
Þat he dide wele in ani land.
4
Wickenes thoght he night and dai
In his kleue þar he lai;
Al wai he stode noght gode to se,
Iuelnes sothlike noghte hated he.
5
Lauerd, in heuen þi merci es,
And to þe kloudes þi sothnes.
6
Als goddes hilles þi rightwisnes;
Þine domes mikel depnes.
7
Men and meres, lauerd, sauue sal tou nou,
Swa als þi merci felefalded þou;
8
And sones of men in hilinge al
Of þine wenges hope þai sal.
9
Þai sal be drunken als of wine
Of þe fulhed of hous þine,
And with welle of þi likinge ai
Sal tou drinke þam, night and dai.
10
For welle of life es at þe,
And in þi name lighte sal we se.
11
Forsprede þi merci thorgh þe land
To þas þat ere þe witeand,
And þi rightwisnes in querte
To þas þat right ere ofe herte.
12
Noght come to me þe fote of pride,
Ne sinful hand me stire biside.
13
Þare felle þat wickednes ere wirkand;
Þai [er] output, ne þai might stand.
