IX.
[1]
I sal schriue to þe, lauerd, in al hert myne,
.I. sal telle alle wondres þine;
2
.I. sal fayne and glade in þe,
And salme to þi name, heghist mai be;
3
In tornand hindeward mi faa;—
Þai ar vnfest and forworth fra þi face sal þa.
4
For þou made my dome and mi skile þat es;
Þou sites ouer trone, þat demes rightnes.
5
Þou snibbid genge mare and minne,
Forworthed wiked for his sinne;
Name of þam þou dide awai
In werlde of werlde and in ai.
6
Faes waned ofe swerde in ende,
And þair cites doune dide þou wende.
7
With dine forworthed mynde of þa;
And lauerd in ai he wones swa.
8
He graiþede in dome to be
His trone; and als deme sal he
Werlde ofe erþe in euennesse,
Deme sal he folk in rightwisnesse.
9
And made is lauerd to-flight þe pouer to;
Helper in nedinges, in drouynge so.
10
And hope in þe þat þi name knewe oghte,
For sekand þe, lauerd, forletes tou noghte.
11
Salmes to lauerd wones in Syon;
Bitwix genges schewes his thoghts on-on;
12
For sekand þar blode he mines in thoght,
Þe crie of pouer forgetes he noghte.
13
Hafe mercy ofe me, lauerd, and se
Mi mekenesse of my faes þat be;
14
Þat vpheues me fra yhates ofe dede,
Þat .I. schewe forth to sprede
Þine loueynges euerilkone
In yhates ofe doghtres of Syon.
15
In þi hele þan sal .I. glade.
Genge feste are in forward þat þai made;
16
In þis snare whilke þai hid swa
Gripen es þe fote ofe þa.
17
Knawen be[s] lauerd domes doand,
Sinful is gripen in werkes ofe his hand.
18
Torned sinful in hell be þai,
Alle genge þat god forgetes ai.
19
For forgetelnes in ende
Noght bes of pouer whare he wende;
Þild ofe pouer ouer alle
Noght in ende forworth salle.
20
Rys, lauerd; noght strenþed man, es righte,
Genge be demede in þi sighte.
21
Set lagh-berer ouer þa,
Wite genge þat men er þai ma.
22
Whi wited [þou] fer, lauerd kinge,
Forsest in nedinges, in drouynge?
23
Whil proudes wicke, pouer brent is;
Þai ere gripen in redes whilk þai thoght mis.
24
For loued es sinful in yernynge
Of his saule, and wicke sal haue blissinge.
25
Gremed lauerd sinful in thoghte;
After mikelhede of his wreth, seke sal he noght.
26
Noght es god in his sight to se;
In alle times his waies filed [b]e.
27
Outborn be his domes fra his face alle;
Of alle his faes be lauerd he salle.
28
For he saide in his hert: “noght sal .I. wende,
With-outen iuel, fra strend in strende”.
29
Of whas mallok his mouth ful is,
Of swykedome, and of bitternes;
Vnder tunge of him als-swa
Swynk and sorwe and mikel wa.
30
He sites in waites with riche of land
In derne, to sla þe vnderand.
31
His eghen bihaldes in pouer men;
He waites in hidel als lioun in den.
32
He waites to reue þe pouer in dim,
To reue þe pouer whil he todrawes him.
33
In his gilder night and dai
Meke him-seluen sal he ai;
He sal boughe him, and falle sal he,
Of pouer when þat lauerd he be.
34
For he saide in his hert: “god forgeten is;
Þat he ne se in ende, he tornes face his”.
35
Ris, lauerd, and vphouen be þi [h]and;
Ne forgete þou pouer in land.
36
For what taried god wicked al?
For he said in his hert: “noght seke he sal”.
37
Ses tou, for swink and sorwe bihaldes tou,
Þat in þi hende þou gyue þaim nou.
38
Bileft es þe pouer to þe;
To fadreles help sal tou be.
39
Brise arme ofe sinful and liþer in thoghte;
Soght bes his sin and funden noghte.
40
Lauerd ryke in ai and in werld ofe werld sal [h]e;
Forworth, genge, fra his land sal ye.
41
Yernyng ofe pouer herd lauerd mine;
For-gra[i]þynge of þair hert herd ere þine,
42
Deme fadreles and meke, and noght set he
Our mikel him man ouer erþe to be.
