CVI.
[1]
“Schriues to lauerd, for gode he is,
For in werld es merci his”,
2
Saie þai with gode wille and thoghte
Whilke þat ofe lauerd ere boght,
Wham he boght of hand of faa,
Fra rikes samened he þa,
3
Fra sun-springe to setelgange,
Fra north, fra þe see swa lange.
4
Þai dweled in annes, in drihede; wai
Ofe cite ofe woningstede noght fand þai;
5
Hungrand and thristand als-swa,—
Þe saule ofe þam waned in þa:
6
And þai cried to god when droued þai ware,
And of þar nedinges he outnam þam þare;
7
And he led þam in right wai,
In cite ofe woningstede þat ga suld þai.
8
To lauerd his mercies be schriuen,
And his wondres to mensones þat liuen:
9
For vnnaite saule he filled with fode,
And hungrand saule he filled with gode.
10
Sittand in schadow ofe dede and mirkenes,
Bunden in iren and wrecchednes,
11
For speches ofe god gremed þai
And taried rede ofe heghist ai,
12
And meked in swinkes es hert ofe þam,
Þai ere seke, and nane was þate helped am:
13
And þai cried to lauerd when droued ware þa,
And ofe þar nedinges he lesed þam swa;
14
And he outled am fra schadow ofe dede and mirkenes,
And brake þar bandes mare and lesse.
15
To lauerd mercies ofe him be schriuen,
And his wondres to mensones þat liuen:
16
For he forgnod yhates brased ware,
And slottes irened brake he þare.
17
[He toke þam fra wai of þar wicnesse,
For þai are meked for þar unrihtwisnesse].
18
Alle mete es wlated þar saule suld fede,
And negh þe yhates of dede þai yhede:
19
And þai cried to lauerd when droued ware þai,
And fra þar nedinges he lesed am ai;
20
He sent his worde, and heled þam,
And fra þar steruinges he þam nam.
21
To lauerd his mercies be schriuen,
And his wondres to mensones þat liuen;
22
And offre þai offrand ofe loofe þat is,
And in gladeschip schewen werkes his.
23
Þat in schippes in see ere doungaande,
In fele watres wirkinge makande,
24
Þai sagh werkes ofe lauerd þare,
And wondres of him in depe þate are.
25
He saide, and stode of storme þe gaste,
And vphouen ere stremes maste.
26
Þai vpstiyhen vntil heuen,
And þai dounga to depnesses euen;
Þe saule ofe þam lesse and mare
In iuels sculked ite þare.
27
Þai ere dreued and ere stired als dronken mis,
And al þe wisedome ofe þam sweliyhed is:
28
And þai cried to god when droued ware þai,
And ofe þar nedinges he outeled am ai;
29
And he sete in winde his stormes stithe,
And his stremes leften lithe.
30
[And þai fainned þat þai ware stille;
And he led þam in hauen of wille].
31
To lauerd his mercies be schriuen,
And his wondres to mensones þat liuen;
32
And in kirke of folke him vpheue þa,
And in setel ofe elde þai him loofe swa.
33
Stremes in wildernes sete he,
And outgange ofe watres in thriste to be;
34
In saltmersche land fruitberande,
Fra iuel ofe in it wonande.
35
He set in weres ofe watres wildernes,
And in outgange ofe watres land watreles.
36
And þare bilouked he hungrand ware,
And cite ofe woningstede sete he þare;
37
And þai set wineyherdes, and feldes þai sewe,
And þai made fruite ofe birthe newe.
38
And he blissed am, and felefalded þai be;
And þare meres noghte lessed he.
39
And þai ere fone made, and swonken ere þa,
For drouinge of iuels, and sorw and wa.
40
Yhotten es a flitinge oure princes a dai,
And made to dwele in wigelinge, and noghte in wai.
41
And he helped poure fra wrecchedhede,
And he set als schepe hinehede.
42
Rightwis sal se, and glade with-al;
And al wicnes his mouth stoppe sal.
43
Wha wys and sal yheme þese in land?
And mercies ofe lauerd sal vnderstand?
