CXXXIV.
[1]
Heriyhes name ofe lauerd ofe blisse;
Heriyhes, hine, lauerd þat isse:
2
Þat in hous ofe lauerd stande yhe,
In porches ofe hous ofe oure god es he.
3
Loues lauerd, for gode lauerd yhite;
Salmes to his name, for softe es ite.
4
For Iacob to him lauerd ches he,
Irael in aght to him to be.
5
For .i. knew þat mikel es lauerd we kalle,
And our god bifore goddes alle.
6
Alle þat euer he wald hafe done,
Lauerd in heuen he dide als sone,
And in erthe, and in þe se,
And in alle depnesses þat be.
7
Fra vttreste of erthe kloudes ledand,
Leueninge in raine he made in land;
8
Þat forthledes windes strange
Fra his hordes forto gange.
Þat smate firstgeten of Egipte ware,
Fra man to beste, noght ane lefte þare;
9
And sente taknes forto see
And fortaknes, Egipt, in mide ofe þe,
In Pharao with mikel wa
And in alle his hine als-swa;
10
Þat smate mani genge amange,
And slogh kinges þat ware strange:
11
Seon, þat was witerli
Kinge ofe þe land ofe Amorri,
And Oge þat kinge was ofe Basan,
And þe rikes ofe Kanaan;
12
And he gafe þar land eritage ilkadel,
Heritage to his folke of Irael.
13
Þi name in ai, lauerd, sal be,
And þi minde in strende and strende to se.
14
For lauerd his folke deme he sal,
And in his hine besekandlike be with-al.
15
Liknes ofe genge ofe siluer and golde,
Werkes ofe mennes hende ofe molde:
16
Mouth haue þai, and noght speke with-al;
Þai haue eghen, and se þai ne sal.
17
Eres haue þai, and noght here sal swa;
Ne sothlike gaste es in mouth ofe þa.
18
Like to þam be made þat maken þa,
And alle þat traisten in þam swa.
19
Hous ofe Irael, god þou blis;
Blisse lauerd, Aaron hous þat is.
20
Blisse lauerd, hous ofe Leui;
Þat dredes lauerd, blisse lauerd for-þi.
21
Blissed lauerd ofe Syon be,
Þat in Ierusalem erdes he.
