LXVIII.
[1]
Beryhed make me, god, of pine,
For income watres in saule mine.
2
.I. am festened in slime depe esse,
And es þare na staþelnesse.
3
.I. come in heghnes of þe see,
And þe storme it sanke me.
4
.I. swanke criand, haase ere made
Chekes mine for pine .i. hade;
Mine eghen waned me of sighte,
Whil .i. hope in mi god of mighte.
5
Felefalded our hare of mi heued ere þai
Þat wilfulli hated me ai;
6
Samen-strenghted ere þai þa
Whilk þat me fileghen, mi faa—
Vnrightwiselike þai dide; for þi,
Þat .i. noght robbed, þan yhald .i..
7
God, mine vnwisedome þou wate bitid;
And mi giltes fra þe noght ere hid.
8
Noght schame in me þam sal bitide,
Lauerd of mightes þat þe abide;
9
[Þai sal be shente in me na-del,
Þat seke þe, god of Israel.]
10
For vpbraidinge tholed .i. for þe;
Oure-hiled schenschip þe face of me.
11
Fremed am .i. made to mi breþer al,
Mi moder sones pilgrime me kal.
12
For loue of þi hous swa gode
Ete me ai als ani fode,
And vpbraidinges of vpbraidand þe
Alle þai fellen ouer me.
13
And .i. hiled mi saule in fastinge,
And it es made to me in vpbraidinge.
14
And .i. set mi kleþinge haire swa,
And in forbisen am .i. made to þa.
15
Againe [me] spaken þat yhate sat inne,
And in me songen þat drunken wine.
16
.I. sothlike, lauerd, mi bede to þe;
Time welquemed, god, ite be:
17
In mikelhed of merci þine
Here me, in sothnes of hele þine.
18
Outake me fra fen of sinne,
Þat .i. be noghte feste þare-inne;
Þat me hates lese me fra þa,
And fra depenesses of watres ma.
19
Noght þai sinke me amange
Storme of watres stith and strange;
Ne oureswelyhe me depenes þat is;
Ne schouue ouer me þe pit mouth his.
20
Here me, lauerd, witterli,
For frendsome es þi merci;
After mikelhed þat be
Of þine rewthes bihald in me.
21
Ne torne þi face fra þi childe dere;
For .i. am droued, swifteli me here.
22
Bihald to mi saule, and lese ite;
For mi faas, outake me yhite.
23
Þou wate mine vpbraidinge,
Mi schenschip, and mi schoninge.
24
In þi sight ere alle þat droues me;
Vpbraidinge and wrecchednes abade mi hert to se.
25
And .i. abade wha samen was mornand
And nane was; wha roned, and .i. ne fand.
26
And in mi mete gaue þai galle to be,
And in mi thriste with aysile dranke þai me.
27
Þaire borde be in snare bifore þa,
And in foryheldinges, and in schame als-swa.
28
Dimmed be þair eghen, þat þai ne se;
And þaire bak ai croked be.
29
Yhet ouer þam þi wreth,
And vmgripe þam mote þi breth.
30
Wildernesse be mad þaire woninge,
And in þaire teldes wone nathinge.
31
For wham þou smate, forthfiliyhed þa,
And ouer sorwe of þair(!) wondes eked þai swa.
32
Set wickednesse ouer þaire wickednes,
And noght inga þai in þi rightwisenes.
33
Of boke of liuand be þai done awai,
And with rightwise noght writen be þai.
34
.I. am pouer and sorwand to se;
Þi hele, god, onfanged me.
35
Loof sal .i. name of mi god with sang,
And mikel him in loof amange;
36
And it sal queme to god ouer kalf newe is,
Forthledand hornes and klees his.
37
Se mote pouer and faine with-al;
Sekes god, and yhoure saule liue sal,
38
For lauerd herd pouer if þai wald oghte,
And his bonden forsoke he noghte.
39
Loof him heuens and erthe als-swa,
Þe se, and alle crepand in þa.
40
For god Syon sauf make sal he,
And bigge þe cites of Iude;
41
And inwone þare sal þai yhite,
And in eritage winne ite.
42
And sede of his hine agh it mone,
And þat loue his name, in it wone.
