LXXXIX.
[1]
Lauerd, þou ert made toflighte til vs
Fra getinge in getinge þus.
2
Ere þat hilles ware þat bene,
Ore schapen was land bidene
And werld, fra werld and in werld isse
Þou ert god ai, fulle ofe blisse.
3
Ne turne þou man in mekenes nou;
And þou saideste: “mensones, torne you”.
4
For bifore þin eghen a thousand yhere
Als yhistredai þate forthyhed here,
5
And yheminge in night; for noght ere hade,
Yheres ofe þam sal be made.
6
It wites als gresse areli at dai;
Areli blomes, and fares awai;
At euen doun es it broght,
Vnlastes, and welkes and gas to noght.
7
For þat we waned in þi wreth,
And to-dreued ere we in þi breth;
8
Þou set oure wickenesses in þi sight to be,
Oure werld in lightinge ofe face ofe þe.
9
For alle oure daies waned þai,
And in þi wreth waned we ai.
10
Oure yheres til vs ere ai,
Als spinnandweb thoght þai;
Daies ofe oure yheres in þa
Sexti yhere and ten als-swa,
11
And ife in mightandes, fourskore yhere;
And mare of þam swinke and sorw here;
12
For ouercomes þan handtamenesse,
And we ben mended mare and lesse.
13
Wha knawes might ofe þi wreth es,
And telle þi wreth for þi radnes?
14
Þi righthand kouth make þou swa,
And lered ofe hert in wisedome ma.
15
Turne—towhen, lauerd mine?—
And winsome be ouer þi hine.
16
Fullefilled ere we wele areli
Thurgh þi mighte with þi merci;
And we gladed ere, grete and smale,
Lusted in oure daies alle.
17
We ere fained for daies whilke þou meked vs,
Yheres in whilke we segh iuels þus.
18
Bihald in þi hine, and in þi werkes ma,
And stere ai wele sones ofe þa.
19
And brightnes of lauerd be
Our vs, ofe oure god, to se;
And werkes ofe our hend ouer vs righte,
And werke ofe our hand righte dai and nighte.
