LXXI.
[1]
God, gif þi dome to kynge þat es,
And to þe kinges son þi rightwisenes.
2
In rightwisenes þi folk deme þou,
And þi poure in dome nou.
3
Nime hilles pais to folke to go,
And knolles rightwisenes als-so.
4
Deme þe poure ofe folke sal he,
And saufe sal he make to be
Sones of poure men with-alle,
And meke þe crauere so he salle.
5
And with þe sunne sal he wende,
And bifore þe mone, in strende and strende.
6
He sal douncome als in flesche raine,
Als goters droppand þe erthe ogaine.
7
Springe sal in his daies alle
Rightwisenes to grete and smalle,
And mightsomnes ofe pees, in ai,
Vnto þe mone be borne awai.
8
And lauerd fra see to see he sal,
And fra streme to meres ofe werld al.
9
Bifor hime falle sal Ethiopes thicke,
And his faas þe erthe sal licke.
10
Kyngis of Thars and of isle lede,
Giftes gode þen sal þai bede;
Kynges of Arabie and of Saba
Giftes lede þai sal als-swa;
11
And loute hime sal kynges alle,
Alle genge hime-to serue salle.
12
For lese sal he poure fra mightand,
And poure þat had na helpe in land.
13
To poure and helplesse forbere sal he,
And saules of poure make saufe to be.
14
Ofe okres and wickednes alle
Saules of þam bie he salle;
And worschepfulle þe name of þa
Bifore hime it sal be swa.
15
And he salle liue, and be gyuen for-þi
To him sal gold of Arabi;
And bid of him sal þai ai,
Blisse him sal þai alle þe dai.
16
Be festenes in erthe sal he
In heghiste of hilles; ouerhouen sal be
Ouer Yban his fruyte, and blome sal þai
Fra cite als fra erthe does hai.
17
In werldes name of him haue blis;
Bifore sunne name of him it is;
18
And blissed be in him sal kyndes alle,
Alle genge mykel him þai salle.
19
Blissed lauerd, god of Irael,
Þat does wondres aneli wel.
20
And blissed name bi night and dai
Of his mastehede sal be in ai,
And be filled with his mastehede so fre
Sal alle erthe, swa be, swa be.
