XLI.
[1]
Als yhernes hert at welles of watres to be,
Swa yhernes mi saule, god, to þe.
2
T[h]risted mi saule night an dai
To god, quicke welle þat es ai:
When .I. sal come and schewen in sighte
Bifor þe face ofe god ofe mighte.
3
Mine teres vnto me þai wore
Laues dai and night þarfore,
Whil ilkadai es said to me:
“Whare es þi god? what es he?”
4
Þis haf .I. mined what mai be,
And .I. yhet mi saule in me:
When .I. sal fare in stede of selkouth telde,
Vnto þe hous ofe god to welde,
5
In steuen of gladschip and ofe schrifte—
Dine of etand þat es swifte.
6
Whi, mi saule, dreri ertou?
And whi todroues þou me nou?
7
Hope in god; for yhit sal .I. to him schriue,
Hele of mi face, and mi god ofe liue.
8
Mi saule todreued es at me;
For þat sal .I. mine ofe þe
Ofe þe [land] of Iordan, and Hermon
Ofe þe littel hille on-on.
9
Depnes depnes inkalles hegh,
In steuen of þi takenes slegh;
10
Alle þi heghnes and stremes of þe
Forth þai ferden ouer me.
11
In dai sent lauerd his merci,
And bi night his sange for-þi.
12
At me bede to god of mi life nou.
.I. sal sai to god: “mi fanger ertou;
13
Wharfore, if þi wille be,
Haues þou forgeten me?
And wharfore murned in .I. go,
Whil þat twinges me þe fo?”
14
Whil broken ere mi banes on-an
Vpbraided me þat droue, mi fan,
15
[Whil al dai þai sain to me:
“Whare is þi god, whare is he?”]
16
Whi, mi saule, driried ertou?
And whi todroues þou me nou?
17
Hope in god, for yhit sal .I. to him schriue,
Hele of mi face, and mi god of liue.
