CIV.
[1]
Schriues to lauerd, and his name ye kalle;
Bitwix genge schewes his werkes alle.
2
Singes to him dai and nighte,
Alle salmes to him; telles righte
Alle wondres of him witerli; Heryed be his name hali.
3
Faine mote herte of lauerd sekand.
Sekes lauerd in ilka land,
And ye be feste; whil þate yhe mai,
Sekes þe face of him ai.
4
Mines ofe his wondres þat [h]e made kouth,
Fortaknes and domes ofe his mouth.
5
Sede ofe Abraham, hine hisse,
Sones ofe Iacob, his chosen to blisse,
6
He lauerd oure god in euermare;
In alle erthe his domes are.
7
He was mined in werld ofe his witeworde hende,
Ofe word þat he sente in thousand strende;
8
Þat he welesete for Abraham sake,
And ofe his aath vntil Ysaace;
9
And he set it to Iacob in bode wele,
In witeworde ai to Iraele;
10
Sayand: “.i. sal giue þe þe land of Chanaan
Stringe ofe þine heritage on-an”;
11
When þai ware ofe schorte tale,
Fone and his tilthe grete and smale.
12
And þai fore fra genge in genge þare,
And fra rike til other folke þat ware.
13
Noght lete he man dere to þa;
And kinges for þam threte he, swa:
14
“Nil yhe negh min cristes nou,
And in mine prophetes nil lithre þou”.
15
And he called hungre ouer land brode
And alle festnes ofe bred forgnode.
16
He sent bifore þam bierne to be;
In hine salde Ioseph es he.
17
Þai meked of him fete þare
In fotefest[l]es, harde þat ware;
Irne thurghyhode his saule ful grim:
Til þat worde come of him.
18
Speche ofe lauerd þat was ofe mighte
Inloghed him bi dai and nighte:
Þe kinge sent, and lesed ilka lim;
Prince of folke, and forgafe him.
19
Lauerd ofe his hous him he made,
And prince ofe alle þe aghte he hade;
20
Þate he lered his princes als himselfe reghte,
And his aldemen teched sleghte.
21
And inyhode Irael in Egipte hand;
And Iacob tiler was in Cham land.
22
And he ayhed his folke swith mikel on-an,
And he feste him ouer his faan.
23
He turned þair herte, þate þai suld hate folke his,
And do swikedom in his hine is.
24
He sent Moises, his hine was, so,
Aaron wham he chese him to.
25
He set wordes of taknes in þam,
And of fortaknes in land ofe Cham.
26
He sent merkenesses, and dimmed þa,
And noghte gremed his saghes swa
27
He turned þair watres in to blode,
And sloghe þair fisches þate ware gode.
28
He forthbroghte froskes, þe land ofe þa,
In thirles of þar kinges ma.
29
He saide, and hundflegh come to falle,
And gnattes in þar endes alle.
30
He set þar raines haile ful schire,
In land of þam brennand fire.
31
And smate þar vinyhes and figetres in-twa,
And forgnode tres ofe endes ofe þa.
32
He saide, and gressop sone come þare,
And brese of whilke na tale ne ware;
33
And he ete in land of þas alle þe hai,
And it ete al þe fruyte of þar land awai.
34
And he smate al firstkinned in land ofe þa,
Sproutes of þar swinke als-swa.
35
And he led am with siluer and golde,
And was nane in þar kinne seke on molde.
36
Fained es Egipte in forthcome ofe am,
For inlai drede of þa ouer þam.
37
He spred kloude in þar forhilinge brighte,
And fire to schine to þas bi nighte.
38
Þai asked, and come þe edissehenne,
And with brede of heuen he filled am þenne.
39
He brake þe stane, and watres outsprange,
Yhoden stremes in drie ful strange.
40
For he mined of his worde hali and milde
Þat he had to Abraham, his childe.
41
And he led his folke in gladnesse,
And his chosen alle in fainenesse;
42
And gaf þam rikes of genge þare,
And swinkes of folke aghte þai mare:
43
Þat þai yheme his rightwisenesses ai,
And lagh of him seke nighte and dai.
