XX.
[1]
Lauerd, in þi might þe kinge fainesal,
And ouer þi hele swith glade with-al.
2
Þou gafe him gerninge ofe hert and thoghte,
And ofe wille ofe his lippes biswiked him noghte.
3
For þou forcome him, als tou es,
In blissing[es] ofe swetenes;
Þou set on his heued on-ane
A croune ofe a derworthi stane.
4
Life þan asked he of þe,
And þou gafe it him to be
Lenght ofe daies, al with blisse,
In werld and in werld of werld þat isse.
5
Mikel es his blisse, night and dai,
In þi hele sa gode es ai;
Blisse and mikel fairehede with-al
Insete ouer him ai þou sal.
6
For þou sal gife him in blissings
In werld ofe werld; forbi alle thinges
Þou salte faine him in mirth righte
With þi lickam, es swa brighte.
7
For þe kinge in lauerd hopes he,
And in mercy of heghiste noghte stired sal be.—
8
Be funden þi hand til al þin ille-willand,
And al þat hates find þi righthand.
9
Þou sal þam set als ouen of fire
In time ofe þi lickam schire;
Lauerd in his wreth sal dreue þa,
And sweligh fire ite sal als-swa.
10
Þair fruit fra erthe forlese þou sal,
And fra sones of men þair sede al.
11
For þai helded in þe iuels vnright;
Þai thought redes whilk staþel þai ne mighte.
12
For set am hindward sal tou swa,
And in þaire leuynges forgraiþe lickam of þa.
13
Vpheue, lauerd, in might of þe;
Þi mightes singe and salme sal we.
