XXI.
[1]
God, mi god, in me bise,
Wharfor forletedest þou me?
Ful fer fra mi hele ere þa
Wordes of mi giltes ma.
2
Mi god, .I. sal crie bi dai,
And þou salt noghte here what .I. sai;
And bi nighte, ife þat ite be,
And to unwisdome noght to me.
3
Þou sothlik in haligh wel
Erdest, loofe of Irael.
Oure fadres in þe hoped þai;
Þai hoped, and þou lesed þam ai.
4
To þe þai cried, and sauf þai ware;
In þe þai hoped, and noght schente þai are.
5
And .I. am worme, and man nathinge;
Mennes vpbraidinge, ofe folke outkastinge.
6
Alle me seand me scorned swa,
With lippes þai spake, and heued stired þa:
7
“He hoped in lauerd, him he outenime;
Sauf make he him, for he wille hime”.
8
For þou ert whilke þat me outdroghe
Fra þe wambe, mi hope inoghe
Fra pappes ofe moder ofe me;
Of maghe forkast .I. am in þe.
9
Fra wambe of mi moder mi god artou:
Ne wite þou noght fra me nou;
10
For þate drouinge es neghande,
And es nane þat es helpande.
11
Vmgaf me ful mani kalues;
Fat bules vmsete me on al halues.
12
Þair mouth ouer me þai ware openand,
Als lioun reuand and rorand.
13
Als watre outyete .I. am at anes;
And tospred ere al mi banes.
14
Made es mi hert als wax meltand
In mides of mi wambe dwelland.
15
Dried als a pot might be
Alle mi might with-innen me,
And mi tunge to mi chekes cleued red;
And þou me led in duste ofe ded.
16
For me vmgafe fele hundes yhete:
Red of liþerand me vmsete.
17
Mi hend, mi fete þai delued wide,
Þai talde mi banes in ilka side.
18
Þai sothlike bihelden swa
And als me inloked þa;
Þai delt to þam mi schroudes ilkan,
And mi cle þinge lote kaste þai on.
19
And þou, lauerd, ne fer þi help fra me;
At mi weringe bihald and se.
20
Outtake mi saule fra swerd to bringe,
And fra hand ofe hunde mine oninge
21
Sauf me fra mouth ofe lioun es,
And fra hornes of vnicornes mi mekenes.
22
Telle þi name to mi breþer .I. sal;
In midde þe kirke looue þe with-al.
23
Þat dredes lauerd, loues him swa;
Al sede of Iacob, blisse mas him to.
24
Drede him al sede of Irael als kinge,
For he ne forsoke ne forsegh pouer biseginge;
25
Ne he tornes his face fra me,
And when .I. to him cried me herd he.
26
At þe mi lofe with mikel blis
In þe kirke þat mikel is;
Mi hetes sal .I. yhelde in land
In þe sight ofe þe dredand.
27
Ete pouer and be filled þai sal;
And looue lauerd þai sal with-al
Þat him sekes for saule quertes;
In werld ofe werld sal life þar hertes.
28
Þai be mined and to lauerd torne þai
Alle endes ofe erth in ai,
29
And lout sal þai in his sighte
Alle hinehedes of genge ful righte;
30
For of lauerd es þe rike,
And he sal lauerd ofe genge ilike.
31
Þai eten and louten þare
Alle fattes ofe erthe þat ware;
In his sight sal be falland
Alle þat dounestiyhen in land.
32
And mi saule to him liue sal;
And mi sede him serue with-al.
33
And schewed sal be to lauerd strend toward es;
And schewe sal heuens his rightwisenes
To folke whilke þat born sal be,
Whilke lauerd him-selfe maked he.
