LXXXV.
[1]
Helde, lauerd, þine ere and here me,
For helples and pour .i. am to se.
2
Yheme me, for halgh .i. am in land;
Saufe make þi hine, mi god, in þe hopehand.
3
Haue merci of me, lauerd, ai,
For to þe cried .i. alle dai;
Faine saule of þi hine for-þi,
For to þe mi saule houe .i..
4
For þu, lauerd, softe and milde to se,
And of fele rewthes til al kalland þe.
5
With ere bise mi bede, lauerd kinge,
And bihald to steuen ofe mi bisekinge.
6
In day ofe my drouynge cried .i. to þe,
For þat þou ai herdeste me.
7
Nane es in goddes to þe, lauerd, like,
And after þine werkes es nane slike.
8
Alle genge, whatkins þou made to be,
Sal come and bide bifore þe,
Lauerd, bath day and nighte,
Mirþe sal þi name of mighte.
9
For mikel ertou, and wondres doand;
Þou ert god ane in alle land.
10
Lede me, lauerd, in þi wai þat esse,
And .i. sal inga in þi sothnesse;
Euer faine mote mi herte,
Swa þate ite drede þi name in querte.
11
.I. sal schryue to þe, lauerd god, in alle hert myne,
And in ai sal blisse name þine;
12
For mikel es þi mercy ouer me to dwelle,
And mi saule þou toke fra inreste helle.
13
Lauerd, wicked inrase in me,
And sinagoge of mightand be,
And soght mi saule dai and nighte,
And noght set þai þe bifore þar sight.
14
And þou, lauerd, rewer and mildeherted maste;
Tholeand, and ofe fele milþes, and sothfaste.
15
Bihald in me witterli,
And ofe me þou haue merci;
Gife heste to þi childe in to wone,
And saufe make þi handmayden sone.
16
Make taken in gode with me,
Þas þat me hates þat þai se;
For me, lauerd, helped þou,
And me roned ertou nou.
