XXIX.
[1]
I sal vpheue þe, lauerd, for þou keped me,
Ne tobreddest mi faas ouer me to be.
2
Lauerd mi god, to þe cried .I.,
And þou heled me for-þi.
3
Lauerd, þou led mi saule fra helle;
Þou keped me fra þat in flosche felle.
4
Singes to lauerd, his halwes mare and lesse,
And schriues to minde of his halines.
5
For wreth es in his mislikinge,
And life in his wil, ofe alle þinge;
6
At euen wepinge dwelle sal,
And at morwhen fainnes al.
7
I sothlik saide in mi mightsomnes:
“.I. ne sal be stired in ai þat es”.
8
Lauerd, in þi wille right
Lent þou to mi fairehed might:
9
Fra me þou torned þi likam,
And to-dreued made .I. am.
10
To þe, lauerd, crie .I. sal,
And to mi god biseke with-al.
11
“What notfulhede in mi blode es,
Whils .I. dounga in wemmednes.
12
Nouwhat sal dust be schriuen to pe
Or schewe þi sothnes for to be ?”
13
Herd lauerd, and es rewed of me:
Lauerd mi helper made es he.
14
Þou torned mi wepinge in mi wa
In blisse to me for to ga;
Þou slitted mi seke in twa,
And vmgafe me with fainnes swa:
15
Þat to þe singe mi blisse wele mare,
And noght sal .I. be stungen sare
Lauerd mi god þat es in ai,
To þe sal .I. schriue night and dai.
