LXXIX.
[1]
Þat steres Irael, take kepe,
Þat ledes Iosep als a schepe;
2
Þat sites oure cherubin:
To schew bifore Effraim,
Manasse and Beniamin,
3
Waken þi might and come nou,
So þat beryhede vs make þou.
4
God, þou turne vs and se,
And schew þi face, and saufe sal we be.
5
God, lauerd of mightes, houlang saltou þis
Be wrath ouer bede of þi hine is?
6
Þou salt fede vs with brede of teres eth,
And gif vs drink in teres in meth?
7
Þou set vs in gainesagh til our neghburs þus,
And our faas snered vs.
8
God of mightes, turne vs and se,
And schew þi face, and hale we sal be.
9
Winyherde broght þou fra Egipt land,
Outkeste genge and set it with þi hand;
10
Leder of wai was þou ai
In sight of it night and dai;
Þou plantedeste rotes hisse,
And it fulfilled land þisse;
11
His schadw ouerhiled hilles hegh,
And his twigges goddes cedres dregh:
12
He streked his paltres to þe se,
And his sproutes to þe streme to be.
13
Wharto did þou his stanwalle awai,
And biripe ite alle þat gane forbi þe wai?
14
Outended it bare of wode swa,
And a beste frate it and nama.
15
God of mightes, bihalde and se fra heuen,
And se and seke þis wineyherde euen;
16
And fulmake þat þi righthand set to be,
And ouer mensones, þat þou feste to þe.
17
Kindled to fire and blawen with-alle,
Fra snibbinge of þi face forworth þai salle.
18
Ouer man of þi righthand þi hand be,
And ouer son of man þat þou feste to þe.
19
We sal noght wite fra þe; quyken vs þou sal,
And we sal calle þi name ouer-al.
20
Lauerd, god of mightes, bihald and se,
And schewe þi face, and hale be we.
