LXX.
[1]
In þe, lauerd, hoped .i.; noght schent .i. be
In ai; in þi rightwisenes lese me, and outake me.
2
Helde to me þine ere of mighte,
And sauue me, bi dai and nighte.
3
In god forhiler to me be,
And in stede warned, þat þou sauf make me;
4
For mi festnesse ai and nou
And mi toflight best ertou.
5
God, outake [me] fra sinful hand,
And fra hand ogain lagh and iuel doand.
6
For þou ert mi þilde, lauerd, in nede;
Lauerd, mi hope fra mi yhouthede.
7
In þe fra wambe fest am .i. nou,
Fra magh of mi moder mi forhiler ertou;
8
In þe ai alle mi singinge.
Made am .i. als fortakeninge
Vnto mani and ful lange;
And þou helper euer strange.
9
Be fulfilled mi mouth with loof, þat
Þi blisse, þi mikelhed alle dai.
10
Ne forwerpe me in vnwelde,
In time when .i. am of elde;
When mi might it wanes oghte,
Lauerd, þou forlete me noghte.
11
For saide vnto me mi faane,
And þat gete mi saule rede made in ane,
12
Saiand: “god forsoke him ai;
Filiyhes bathe be night and dai,
And vmlappes him on-ane,
For þat outakes es it nane”.
13
God, ne fer þou fra me;
Mi god, in mi helpe bihalde to se.
14
Schent and wanande be þa
Bakbitand to mi saule swa;
Ouerhiled with schenschipe and schame be
Þat sekes iuels vnto me.
15
.I. sothlik ai hope sal inwardeli,
And eke ouer al þi loofe sal .i.
16
Mi mouth sal schewe þi rightwisenes,
Alle þe dai þi hele þat es.
17
For .i. knewe noght boke writen al,
Ingo in mightinges of lauerd .i. sal;
Lauerd, .i. sal mine witterli
Ofe þine rightwisenes aneli.
18
God, þou taght me fra yhouþe mine;
And to nou sal .i. schewe [wondres] þine.
19
And til in vnelde and alderelde,
God, ne forlete [me] in vnwelde,
20
Til .i. schew þine arme with blis
To strende alle þat towarde is;
21
Þi mightinge, and þi rightwisenes,
God, in til heghist ai þat es;
Whilke grete thinges þou made to be—
God, wha like is to þe?
22
Hou fele þou schewed me drouynges,
And mani oþer iuel thinges!
And turned, þou quikened me to be,
And fra depenes of erthe led þou me.
23
Þou felefalded þi mikelnes;
And turned, roned me þou es.
24
For and in lomes sal .i. to þe schriue
Of salme þi sothnes, god on liue,
And singe sal .i. to þe wel
In harpe, halgh of Irael.
25
Glade sal mi lippes when .i. hafe sungen to þe,
And mi saule þat þou boght fre.
26
Bot and mi tunge sal thinke alle daie
Þi rightwisenes, whiles liue .i. maie,
When þai schent and schoned be
Þat iuels seken vnto me.
