LXV.
[1]
Mirthes to god, alle land þat is;
Salme saies to his name, to his loof giues blis.
2
Saies to god: “hou dredful are
Þine werkes, lauerd, lesse and mare!
In þe mikelhed of þi mighte
Lighed to þe þine faas vnrighte.
3
Alle land loute þe and sing to þe sal,
And salme sai to þi name with-al.
4
Come and sees, goddes werkes mones;
Dredful in redes ouer menes sones.
5
Whilk þat tornes þe se
In mikel drihed for to be;
In streme on fote sal we forthfare,
In him sal we faine þare.
6
Þat lauerdes in his might in ai,
His eghen on genge bihald þai;
Þat smert, noght vphouen al
In þam-seluen be þai sal.
7
Genge, our god al ye blisse,
Herd makes steuen of loof hisse.
8
Þat set mi saule at lif to be,
And mi fete in stiring noght gaf he.
9
For þou fanded vs; with fire, god of blisse,
Þou fraisted vs, als siluer fraisted isse.
10
Þou led vs in snare to ga;
Þou set drouinges in our bake ma;
Þou insete men mani swa
Ouer our heuedes to be þa:
11
Bi watre and fire ferde we,
And þou led vs in kaldhed to be.
12
In þi hous inga sal .I.
In offranded sothfastli;
Yhelde .I. sal to þe mi hotes swa
Whilke twifalded mi lippes twa;
13
And spoken has mi mouth som thinge
When .i. was in mi drouinge:
14
“Offrandes merghed bede .i. sal
To þe, brinninge of schepe with-al;
Bede sal .i. oxen vnto þe
With buckes, gode and fate þat be”.
15
Comes and heres, and .i. sal telle, al yhe
Þat dredes god, what to mi saule dide he.
16
To him with mi mouth cried .I.,
And .i. gladed vnder mi tunge for-þi.
17
In mi hert if .i. biheld wikenes,
Noght here lauerd sal, what ite es.
18
For-þi herd god of heuen kinge,
And biheld to steuen of mi bisekinge.
19
Blissed god, for noght stires he
Mi bede, ne his merci fra me.
