LXI.
[1]
Noghtne to god mi saule vnderlaide be sal?
Fra him sothlike mi hele al.
2
For and he mi god, and mi hele for-þi,
Mi fanger; be stired namare sal .I..
3
Til þat ye onrese in man swa,
Yhe al, vnto yhe sla,
Als a heldeand wagh mai be
And a stanewalle douneput to se.
4
Bot mi worth þai thoght to schouue awai;
In thrist ran .I. night and dai;
With þaire mouth þan blissed þai,
And with þair hert þai weried ai.
5
Bot to god, mi saule, vnderlaide þou be,
For fra him al þe þild of me.
6
For he es mi god and mi beryher al,
Mi helper; noght outga .I. sal.
7
In god mi hele and mi blisse;
God of mi helpe, and mi hope in god isse.
8
Hopes in him stedfasteli,
Alle sameninge of folk, for-þi;
Bifor him your hertes yhet yhe;
God oure helper in ai es he.
9
Bot fantom, sones of men ere þai,
Liyhers sones of men are ai
In weghtes, þat biswike þa
Of fantom in him-seluen swa.
10
Nil þou hope in wickednes,
And reuinges nil yhern mare ne les.
Welthes if þai stremen smert,
Nil þou set on þam þi hert.
11
Anes spak god, twa þese herd .I.:
For might of god es ite, and merci
To þe, lauerd: for þou yhelde salle
Til ilkan after his werkes alle.
