4
Ne mi wicnes, lauerd, ne mi sinne for-þi;
With-outen wiknes .I. ran, and righted .I..
5
Ris in againres mine, and se wel.
And þou, god of mightes, god of Irael,
6
Bihald to seke [al] folke mare and lesse;
Þou rewes noght alle þat wirke wickenes!
7
Þai be torned at euen, and hunger thole þa
Als hundes, and cite þai sal vmga.
8
Loke, in þair mouth speke sal þa,
And swerd in þair lippes; “for herd wha?”
9
And þou, lauerd, scorne þam sal,
And to noght lede þe genge al.
10
Mi stalworthede night and dai
Sal .I. yheme vnto þe ai;
For god mi fanger: mi god, for-þi
Bifor me sal come þi merci.
11
God schewes me ouer mi faas; ne þam sla,
Leswhen mi folke forgeten be þa:
12
Tosprede þam in might þine,
And lete am, lauerd, forhiler mine.
13
Gilt of þar mouth, sagh of lippes of þa;
And gripen in þaire pride ere þai swa.
14
And of legh and of cursinge
Sal þai be schewed in endinge,
15
In þe wreth of ending al,
And noght þan be þai sal.
And wite sal þai þat god lauerde sal he
Ofe Iacob, and of endes of erthe þat be.
16
Þai sal be torned at euen, and hunger thole þa
Als hundes, and þe cite þai sal vmga.
17
Þai sal be tospred to ete al dai;
And ife þai be noght filled, grucche sal þai.
18
And þi strenghte singe sal .I.,
And hegh ful areli þi merci;
19
For made ere tou mi fanger ai,
And mi toflight in mi drouing dai.
20
Mi helper, to þe singe .I. sal;
For god mi fanger, god mi merci al.
