XLIX.
[1]
God of goddes, lauerd, spake he,
And þe erthe he kalled to se,
2
Fra sonne springe to setelgange;
Fra Syon wlite of his fairehed lange.
3
God he [sal come] openli,
Our god, and noght blinne forþi.
4
Fire in his sight sal brenne sothli;
And in his vmgange storme worthi.
5
He kalled þe heuen abouen of blisse,
And þe land, to schede folke hisse.
6
Samenes his halighes til his hand,
Þat welesettes witeworde ouer offrand.
7
And schewe sal heuens his rightwisnes,
For god domesman he es.
8
”Here, mi folk, to me somdele
And .I. sal speke to Irael,
And .I. sal witnes to þe for-þi
God, god þine þat am .I..
9
Noght in offrandes sal .I. threte þe righte;
For þi smereinges ai ere in mi sighte.
10
Noght sal .I. take fra þi hous kalues,
Ne fra þi faldes bockes, on na halues;
11
For mine ere alle bestes of wode,
Meres in hilles, and nete gode.
12
I knewe alle þe flightfoghel of heuen,
And fairehede of felde with me es euen.
13
Yife me hungre, noght sal .I. sai þe þis;
Mine es ertheli werld, and fulhed his.
14
Wher .I. sal ete of bules flesche?
Or drinke þe blode of buckes nesche?
15
Offrand of loof to god offre þou,
And yhelde til hegheste þi hates nou.
16
And in dai of drouinge kalle þou me;
Þou salt worschipe me, and .I. sal outake þe.”
17
To sinner sothlike said god þat es:
“Whi telles þou mi rightwisenes?
And nimes als-swa bi þi mouth
Mi witeword þat es swa kouth?
18
Þou sothlike hated lare,
And forthkeste mi saghes hindward þare.
19
Ife þou sagh thefe, þou ran with him yete;
And with wedbrek þi dele þou sete.
20
Þi mouth mihtsomed iueles swa,
And þi tunge herded swikedomes ma.
21
Sitand, þi broþre þou spake ogain,
And ogain þi modre sun with main
Set þou sclaundre witerli.
Þes dide þou, and ai blan .I..
22
Þou wendest ful wickedli
Þat .I. sal be like to þe for-þi:
.I. sal threte þe, and with-al
Set ogain þi face .I. sal”.
23
Vnderstandes þese in thoghte,
Whilke þat god forgeten oghte;
Leswhen þat he reue on-an,
And wha þat outake bes þare nan.
24
Offrand of lof, gode es and right,
Sal worschip me be dai and night;
And þider whilk .I. sal his wai
Schewe him hele of god in ai.
