XLVII.
[1]
Mikel lauerd, and loouelike swithe he is,
In cite of oure god, in hille hali his.
2
Grounded with gladschepe be onon
Alle landes; hille of Syon,
Sides of north, þe cite
Of god mikel þat ai sal be.
3
God in his houses be knawen sal
When þat he has fanged ite al.
4
For loke, kinges of erthe ilkan
Þai ere samened, and comen in an:
5
Forwondred ere þai seand swa,
Þai ere droued, þai ere stired, drede griped þa;
6
Þare sorwes als of kineland nou;
In strange gaste schippes of Thars forthrist saltou.
7
Als we here, sa se we right
In cite of lauerd of might,
Of our god in þe Cite;
God grounded it in ai to be.
8
We onfanged, god, þi merci
In mid of þi kirke inwardeli.
9
After þi name, god, swa isse
Þi loofe ful of mikel blisse
In þe endes ofe þe land.
Of rightwisnes ful es þi righthand.
10
Faine mote þe hille of Syon,
And glade sal þai sone on-on
Þe faire doghtres of Iude,
Lauerd, for domes of þe.
11
Vmgiues Syon, and vmklippes it;
Telles in his toures yhit.
12
Settes youre hertes, night and dai,
In might of him to be ai,
And to-deles his houses ma,
In othre kinde þat ye telle swa.
13
For he es god, oure god in blisse,
In ai, and in werld ofe werld þat isse;
He sal stere vs with his might
In werldes, bi dai and night.
