XXXVIII.
[1]
I saide: mine wais yeme .I. sal,
Þat .I. ne gilt in mi tunge with-al.
2
.I. set yheminge to mi mouth at be
Whil sinful stode ogaines me.
3
.I. doumbed, and meked, and was ful stille
Fra godes; and mi sorwe es newed ille.
4
Het mi hert with-inne me swa;
And in thoght sal bren fire for wa.
5
.I. spak in mi tunge: Kouth ma to me,
Lauerd, mine ende when it sal be,
6
And tale of mi daies whilke es, for-þi,
What me wanes þat wite mai .I.
7
Loke, methfullike mi daies sete þou;
And mine aght als noght bifor þe nou.
8
Þowheþer al fantomes in land,
Ilka man þat es liueand.
9
Bot in liknes thurghfars man;
Bot and ydel es he droued on-an:
10
He hordes, and he wate noght
To wham þat he samenes oght.
11
And nou, whilke es m[i]n abidinge dai?
Noghtne lauerd? and mi spede at þe es ai.
12
Of alle mi wikenes outake me nou:
Vpbraiding til vnwis me gaf þou.
13
.I. doumbed, and noght opened mouth mine,
For þou made; stire fra me woundes þine.
14
Fra strenghte ofe þi hand waned .I.
In snibbinges witerli;
For wickednes þat he was inne
Ouerthrew þou man and his kinne,
15
And to skulke als irain þou made saule his:
Bot vnnaitlike to-droued ilke man is.
16
Here, lauerd, mi bede and bisekinge mine;
Bise mine teres with eres þine.
17
Ne blinne; for comelinge .I. am at þe,
And pilgrim, als al mi fadres be.
18
Forgiue me; þat kalde .I. ware
Er .I. sal ga and be namare.