XXXVII.
[1]
Lauerd, ne threte me in þi brethe,
Ne ouertake me in þi wrethe.
2
For þine arwes stiked ere to me,
And ouer me þou fest þi hand to be.
3
Noght es hele in flesche mine
Fra þe face of wreth þine;
Ne pais es in mi banes none
Fra þe anleth ofe mi fone.
4
For mi wicnesses mi heued ere ouergon,
Als heui birþin heuied me on.
5
Stanke and roten mine erres ere ma,
Fra face of mine vnwisdome swa.
6
Wrecched and croked til ende am .I.;
Alle dai dreried .I. inwent for-þi.
7
For mi lendes filled with bismers are,
And hele in mi flesche es na mare.
8
.I. am twinged, and meked for vnquerte;
.I. romied fra sighinge of mi herte.
9
Lauerd, bifor þe alle mi yorninge,
And fra þe noght hid es mi sighinge.
10
Mi hert es droued with-inne me,
And forsoke mi might with me to be;
And light of mine eghen twa,
And it es noght with me swa.
11
Mine frendes and mine neghburs gode
Ogaines me neghed and stode;
12
And þat bi me ware, þai stode o-lenght;
And [þat] soght mi saule, þai maked strenght.
13
[And þat soht to me iuels, fantoms spake þai,
And swikdoms þoht þai al þe dai].
14
And .I., als defe, noght herd of þis;
And als doumb noght openand mouth his.
15
And .I. [am] made als [man] noght herand,
And storest speches in his mouth noght hauand.
16
For in þe, [lauerd], hoped .I. nou;
Lauerd mi god, me here sal tou.
17
For .I. saide: leswenne ilkane
Ouer-mirthe to me mi fane;
And whil stired ere mi fete, ouer me
Mikel thinges speken he.
18
For in swepinges am .I. dight,
And mi sorw ai in mi sight.
19
For mi wikenes schewe .I. sal al,
And for mi sinne thinke .I. sal.
20
Mi faas sothlike liueand þai be,
And festened ere þai ouer me;
And manifalded ere þai for-þi
Whilke hated me wickeli.
21
Þat yheldes iuels for godes, bacbate me,
For .I. filyhed godenes to se.
22
Ne forlete me, lauerd mi god, ai;
Ne wite fra me, night ne dai.
23
Bihald in mi help for þi blisse,
Lauerd god of mi hele isse.
