XXXII.
[1]
Glades, rightwise, in lauerd kinge;
Þe right feres to haue louinge.
2
Schriues to lauerd, in harpe and sautre
Of ten stringes to him singe yhe.
3
Singes to him newe sange and euen;
Wele singes to him in berand steuen.
4
For right es worde ofe lauerd ai,
And alle his werkes in trewethe ere þai.
5
For he loues merci, dome, þa twa;
Ofe lauerdes merci þerthe ful es swa.
6
With worde of lauerd heuens fest ere ma,
And blast ofe his mouth al might of þa.
7
Samenand als in lome watres ofe se;
In hordes settand depnes to be.
8
Alle erthe lauerd be dredand,
[And] of him stired al þe werld erdand.
9
For he saide, and þai maked are;
He sent, and þai schapen ware.
10
Lauerd scaters rede of genge ma,
He schones thoghts of folke als-swa,
And þe redes schones he
Of al þe princes þat mai be.
11
And rede of lauerd es with-outen ende;
His hert thoghts in strende and strende.
12
Seli genge whilk lauerd god hisse is;
Folke þat he ches him in heritage his.
13
Fra heuen biheld lauerd þare he wones;
He loked ouer al mens sones;
14
Fra his forgraiþhed telde on hegh
Ouer al þat erden erthe he segh:
15
Þat feined sinderlike hertes ofe þa;
Þat vnderstandes al þaire werkes swa.
16
Þe kinge sal noght [be] beryhed right
T[h]orgh-out nakins mikel might,
And þe eten noght be sauued sal
In mikelhed of his might al.
17
Swikel hors at hele; ofe mightsomnes
Sothlik of his might noghte bery-hed es.
18
Loke, eghen of lauerd ouer him dredand,
And in þas in his merci þat ere hopand;
19
Þat þair saules dede take he fra,
And in hunger fostre þa.
20
Oure saule lauerd vphalde sal,
For he es oure helper and oure schelder al.
21
For faine sal oure hert in him to be,
And in his hali name hoped we.
22
Þi merci, lauerd, be ouer vs,
Swa als we hoped in þe þus.
