XIII.
[1]
Þe vnwise saide in hert his
Als a foele, þat god noght is.
2
Forbroken and wlatful made þai are
In þair thoghts lesse and mare;
Whilke þat gode dos es þare nane,
Es þare nane to lepi ane.
3
Lauerd fra heuen, þare he wones,
Forthloked ouer mennes sones,
Þat he se whar he vnderstand,
Or yife he be god sekand.
4
Alle helded þai, samen ai
Vnnoteful maked are þai;
Whilke þat gode does is þare nane,
Is þare nane to lepi ane.
5
Openand thrugh es throte ofe þa,
With þair tunges swikelli dide þaiswa;
Atter of snakes swythe strange
Vnder lippes ofe þaim amange.
6
Mouth ofe wham ofe malloke es
Fulfilled and ofe bitternes;
Swifte þe feet ofe þaim vngode
Ai are for to spille blode.
7
Forbreking and vnselines ai
In waies ofe þaim, and þe wai
Ofe pees noght knewe þai; noght is swa
Drede ofe god bifor eghen ofe þa.
8
Þai knawe noght, alle þat wirkes quede,
Þat swelighis mi folke als mete of brede!
9
God noght kalled þai apon;
Þai qwoke for drede þar drede was non.
10
For lauerd night and dai
In rightwise getinge es he ai;
Rede ofe helples toyute þou,
For þat lauerd his hope es nou.
11
Wha sal gife ofe Syon hele to Irael!
When lauerd has torned wrecchedenes wele
Of his folk, Iacob glade salle,
And faine sal Irael with-alle.
