CXVII.
[1]
Schriues to lauerd, for gode he isse,
For in werld es merci hisse.
2
Saie nou Irael: for gode he isse,
For in werld es merci hisse.
3
Saie nou Aaron hous for-þi:
For in werld es his merci.
4
Þat dreden lauerd, saie þai:
For in werld his merci ai.
5
Fra drouinge lauerd kalled .i;
And lauerd herd me in brede for-þi.
6
Lauerd helper to me es he;
Noghte sal i. drede whate man does me.
7
Lauerd helper es to me;
And mi faas .i. sal forse.
8
Gode to traiste in lauerd it es ai,
Þan traiste in ani man be mai.
9
Gode to hope in lauerd es ite,
Þan to hope in pri[n]ces yhite.
10
Alle genge vmyhode me ma;
And in name ofe lauerd for .i. am wroken in þa.
11
Vmgiuand vmgafe me swa;
And in name ofe lauerd for .i. am wroken in þa.
12
Als bees vmgafe þai me þare,
And þai brente als fire in thornes ware;
And in name ofe lauerd for-þi
Wroken wele in þam am .i..
13
.I. am pute, .i. am turned, þat .i. suld falle;
And lauerd vpfange me with-alle.
14
Mi strenghte and mi lofe lauerd es he;
And made ite es in hele to me.
15
Steuen ofe gladschipe and ofe hele sal rise
In þe telde ofe rightwise.
16
Lauerdes righthand made might, lauerd hand righte
Vphoue me; lauerd righthand made mighte.
17
Noght sal .i. die, bote liue .i. sal;
And lauerd werkes telle with-al.
18
Ȝraihand lauerd me ȝrahed he,
And to dede noght gafe he me.
19
Rightwise yhates open to me þa:
And in þam .i. sal inga,
.I. sal schriue to lauerd. þis yhate lauerdes isse,
Rightwise sal ga in ite with blisse.
20
.I. sal schriue to þe, for þou herd me,
And made ere tou me in hele to be.
21
Þe stane whilke biggand forsoke,
Ite es made in heued ofe þe noke.
22
Fra lauerd maked es þisse,
And in oure eghen wonderfulle ite isse.
23
Þis es þe daie þat lauerd made to be;
Glade we in ite, and faine we.
24
A lauerd, saufe make þou me;
A lauerd, in querte to be.
Blissed be, þe wilde and tame,
Whilke þat comes in lauerdes name.
25
Fra lauerdes hous to you blissed we;
Gode lauerd, and til vs lighted he.
26
Settes miri daie in thickenesse,
Vnto horn þat ofe weued esse.
27
Mi god þou erte, and .i. sal schriue to þe;
Mi god þou erte, and .i. sal vpheue þe.
28
.I. sal schriue to þe, for þou herd me nou,
And to me in hele made ertou.
29
Schriues to lauerd, for gode he isse,
For in werlde es merci hisse.
